Ulloq septemberip 24-iat, danskit ministeriunerata Mette Frederiksen-ip eqqunngitsumik spiralilersuisimanerit pillugit utoqqatserneranut oqaaseqaat.
Ullumi 24. septembarip Mette Frederiksen, Danskit ministeriunerat pinngitaaliilluni spiralilersuisimanermi utoqqatsissaaq.
Siullermik pingaarnermillu Inuit Ataqatigiit arnarpassuit niviarsiaqqallu ilisimatinneqaratik akuersinatillu spiralilersorneqarsimasunut minnerunngitsumillu ilaqutaasunut misiginneqataangaarpugut.
Utoqqatserneq pissusissamisoorpoq aamma utoqqatserneq kukkusimanermut nassuerutaammat danskit akisussaaffimmik tigusinissaat, soorlu taarsiiviginninneq minnerpaatut naatsorsuutigaaput.
Utoqqatserneq taarsiiviginninnerlu ikinik mamisaanavianngilaq, kisiannili pingaaruteqarpoq danskit naalagaaffiata nunasiaataanermi iliuuserisimasaat pisinnaatitaaffinnik unioqqutsitinerusoq, minnerunngitsumillu eqqunngitsuliornerusoq nassuerutiginissaat.
Eqqunngitsumik spiralilersuinermi inuiaqatigiitsinni sakkortuumik sunniuteqarnikuuvoq ulloq mannalu tikillugu suli sunniuteqarluni. Ilami naatsorsuutigineqarnikuuvoq eqqunngitsumik spiralileruisimasoqanngitsuuppat ullumikkut Kalaallit Nunaanni innuttaasuusugut 90.000-iusimassagaluartugut.
Arnarpassuit aappaallu meerartaanngitsoornikuupput, taannalu timikkut tarnikkullu kingunerlutitsinermik kinguneqarpoq.
Inuit Ataqatigiit piumasaqaatigaat eqqugaanikut taarsiiffigineqarlutillu ikiorserneqassasut, soorlu nalaatat pillugit oqaloqatiginninnissamut, tamanna danskit naalagaaffiata aamma akisussaaffigaa.
Utoqqatserneq mamisaanermut alloriarneq siullertut isigaarput. Taassuma saniatigut Inuit Ataqatigiinni ilisimavarput nunasiaataanermi oqaluttuarisaanermilu danskit iliuuserisimasaat amerlanerummata, taamaammat piumasaqaatigissavarput qulaajaaneq ammasumik unneqqarittumillu ingerlasuassammat.
Inuit Ataqatigiinni piumasaqaatigaarput Danskit naalagaaffiata akisussaaffik nammineq tigussagaa, akisussaaffimmik tigusineq utoqqatsernerinnaanngilaq, kisianni aamma taarsiiviginninneq. Iliuuseqarani utoqqatserneq akuerinavianngilarput.
Nivi Rosing, Inatsisartunut ilaasortaq, Inuit Ataqatigiit.
