Folketingimut qinikkat

Folketingimi Kalaallit Nunaata nipaa

Folketingimi Inuit Ataqatigiit innuttaasut kalaallit soqutigisaat Folketingimi isumagisarpaat. Tamannalu atuuppoq Kalaallit Nunaanni innuttaasunut aamma kalaallinut Danmarkimi najugalinnut. Inuiaqatigiinni kalaallini malunnaatilinnik pitsannguisoqarnissaa kissaatigaarput aamma peqataaffigerusullugu Kalaallit Nunaata nunarsuatsinni patajaannerusumik akisussaanissaa.

Ullutsinni tamanut atugassiat aamma inuunermi atugarisat

Inuit Ataqatigiit qularnaarniarpaa, danskit naalagaaffiata neriorsuutiminik eqquutsitsinissaa, tassalu danskit naalagaaffiata Kalaallit Nunaanni akisussaaffigisaani periutsit pitsaanerpaat aallaavigalugit ullutsinni tamanut atugassianut pitsanngorsaajumalluni neriorsuutaa.

Akuersaarsinnaanngilarput inuunermi atugarisat malunnaatilimmik assiigiinngissuteqarnerat Kunngeqarfimmi suli atuuttoq, minnerunngitsumik Kalaallit Nunaanni illoqarfiit isorliunerusullu akornanni. Tamanna nikingassutaavoq iliuuseqarfigineqartariaqartoq. Kalaallit Nunaata oqartussaaffigisassatut tigunikuunngisaani danskit naalagaaffiat Kalaallit Nunaanni innuttaasunut Danmarkimi innuttaasunut akisussaaffimmi asserluinnaanik akisussaaffeqarpoq. Taamaammat tamanut atugassiat minnerpaamik assigiittariaqarput.

Kalaallit Nunaat peqataajuassaaq

Piffissanngorpoq kunngeqarfiup ilusiligaanera pillugu eqqarsaatiginninnissarput naligiissitaanermillu piviusumik pilersitsilluta. Pissutsit taamaaginnarsinnanngillat. Kunngeqarfimmi aalajangiiuarnerni Kalaallit Nunaat qitiusumik peqataasariaqarpoq.   Maannatut ingerlaannassagutta ataatsimooqatigiiffipput sannngiinnerulissaaq. Nunarsuaq allanngoriartortillugu suleqatigiinnerput aamma taama pisariaqarpoq.

Kalaallit Nunaata, Savalimmiut Danmarkillu piviusunmik naligiilernissaat, tunngaviusumik inatsisip atuuttup iluani pisinnaanngilaq. Taamaammat Inuit Ataqatigiit tunngaviusumik inatsisip allanngortinneqarnissaa kissaatigaat, sinaakkutaasut iluanni Kalaallit nunaat inissisimaleqqullugu. Qularinngilarput tamatumani piffissaq sivisooq pisariaqassasoq, taamaammat ilutigisaanik aamma sulissutigivarput, Naalakkersuisut nunanut allanut illersornissamullu tunngasutigut suli amerlanernik oqartussaaffeqalernissaat.  Tamanna politikkitsigut malunnaatilimmik allannguineruvoq,”peqataaffiginngisatsinnik uagut pineqassanngilagut”-miit Kalaallit Nunaat peqataajuassaaq”-mut. Nunarsuarmioqatigiinnut ilaavugut, piumasarivarpullu aalajangiinernut siunissatsinnik ilusilersueqataasunut peqataatinneqarnissarput.