TUSAGASSIUUTINUT NALUNAARUT
Nunani avannarlerni siunnersuisoqatigiit Kalaallit Nunaata nunatut allatulli pineqarluni ilaasortanngorsinnaaneranut Nunat avannarliit siunnersuisoqatigiiffiata allattaanerata tapersiinera qujanarpoq, naalakkersuisulli siulittaasoriligallagaata suleqataaniarnermut tunngatillugu oqariartuutaa eqqarsarnartoqarpoq.
Nunat avannarliit siunnersuisoqatigiiffiani nunatsinnit aallartitatut siornatigulli nunatta nunatut allatulli naleqartinneqarluta isigineqarnissarput anguniarlugu sulissuteqartutut nuannaarutigilluinnarpara Nunani Avannarlerni Siunnersuisoqatigiinni allattaanerup avammut Nunatta Savalimmiut Ålandillu ilaasortanngorsinnaanerannik tapersiilluni nalunaaruteqarnera.
Nunatsinni Naalakkersuisut siusinnerusukkulli immikkoortinneqarlutik ataatsimiinerit ilaanni peqataasinnaatitaannginnertik patsisigalugu Nunat Avannarliit siunnersuisoqatigiivini naalakkersuinikkut peqataajumannginneq ingerlasoq ingerlateqqiinnarniarlugumik nipilimmik Naalakkersuisut siulittaasoriligaata tusagassiutini tusakkatsinni nalunaaruteqarnera tusarparput.
Inatsisartutigut Naalakkersuinikkullu anguniagarput ataasiusoq nalunanngilaq nuannerlunilu, taamaattorli Nunat Avannarliit Siunnersuisoqatigiinni ukioq ataaseq sinnerlugu Helsingorforsimi isumaqatigiissutip nutarternissaannut Nunarput sinnerlugu suleqataasimallunga, nutarterneqarnissamut siunnersuutip maanna nunat avannarliit naalakkersuisoqatigiivinut suliassamik ukiaq 2024-imi tunniussinikuunerput qanortoq nunatsinni naalakkersuisunit aammattaaq pingaartinneqarluni suleqataffigineqarili, tamannami anguniakkatsinnik angusaqarnissamut aqqutissaamat pingaaruteqarluinnartoq, suleqatigiinneq anguniakkamik angusaqarnissamut periarfissiisoq atorluaqqunaqaaq.
Inuit Ataqatigiit sinnerlugit Nunarpullu sinnerlugu Nunat avannarliit siunnersuisoqatigiivini aallartitaq.
Mariane Paviasen Jensen
