2016 Narsami urani pillugu Inuit Ataqatigiit isumasioqatigiititsissapput

Inuit Ataqatigiit Narsami juunip 11-ni 2016 urani pillugu isumasioqatigiititsissapput. Isumasioqatigiinnermi uranisiornerup avatangiisinut, peqqissusermut nunallu tamalaat akornanni pissutsinut sunniutai sammineqassapput. Nunatsinnit, Canadamit Australiamiillu oqalugiartoqassaaq uranisiornermit ulorianartunillu qinngornernut ilisimasanik avitseqatigiittoqarluni.

”Isumasioqatigiinnermi Inuit Ataqatigiit kissaatigaarput nunanit allanit misilittakkat Nunatsinni oqallinnermi sammineqarpiarneq ajortut Nunatsinnut anngutissallugit. Pingaartissimavarput Canadamit Australiamiillu misilittakkat assersuutitut pitsaasutut oqaatigineqakkajuttut toqqaannarnerusumik tusarfigissallugit. Isumasioqatigiinnermit isummat assigiinngisitaarnerusut Nunatsinni oqallinnermut apuunnissaat kissaatigaarput”, Sara Olsvig, Inuit Ataqatigiit siulittaasuat oqarpoq.

Quebecimi Grand Council of the Crees siuttuat oqalugiassaaq

Canadamit inuiaat Cree-t siuttuat, Grand Chief Matthew Coon Come peqataassaaq oqalugiassallunilu. Inuiaat Cree-t Quebec-mi uranisiornissamut ukiopassuarni akerliupput. Ilaatigut Cree-t inuusuttortai nunartik itivillugu 850 kilometerit pisunnermikkut uranimut akerliunertik takutippaat.

Nunavummit naggueqativut Inuit ilaat isumasioqatigiinnissamut aamma tikissapput. Nunavummiut Makituganarningit, Baker Lake-mi uranisiornissamut akerliusut sinniisui Hilu Tagoona aamma Jack Hicks peqataassapput.

Canadamit aamma Gordon Edwards, Ph.D-usoq peqataassaaq. Edwards Physicians for Global Survival-mut, suliniaqatigiiffimmut qinngornernik ulorianartunik inuit peqqissusaannut sunniutaannik ilisimasaqartumut ilisimatusarnikkut siunnersortaavoq.

Australiamit misilittakkat aamma tusarfigineqassapput

Isumasioqatigiinnermi aamma Australiami ukiorpassuarni uranisiorfiusimasumit misilittakkat tusarfigineqarsinnaassapput. Dr. Bill Williams, qinngornernik ulorianartunik inunnut sunniutaannik immikkut ilisimasalik, oqalugiassaaq. Taanna Australiami Campaign to Abolish Nuclear Weapons-mut siulittaasuuvoq, suliniaqatigiiffik nunat tamalaat akornanni atomip nukinganik sakkussianik atuinnginnissamut anguniagaqartuuvoq.

Nunatsinnit Savaatillit Peqatigiit Suleqatigiissut peqataassapput Narsamilu uranimut angertut naaggaartullu oqalugiartussatut aamma qaaqqusaasimallutik.

Greenland Minerals and Energy Ltd. Kuannersuarni misissuinissamut akuersissutillit oqalugiarnissamut aamma qaaqqusaapput.

Isumasioqatigiinneq tamanut ammavoq

Isumasioqatigiinneq Inuit Ataqatigiit partiitut aasaanerani ataatsimiinneranut atatillugu ingerlanneqassaaq. Taamaammat partiip qinigaatitai peqataassamaarput, partiilli allat tamarmik aamma isumasioqatigiinnermut qaaqqusaapput. Tamatuma saniatigut kattuffiit susassaqartullu allat isumasioqatigiinnissamut peqataasussatut qaaqqusaapput.

Peqataanissamut soqutiginnittoqarpat paasisaqarnerusoqarusuttoqassappalluunniit Inuit Ataqatigiit Kattuffiata allattoqarfianut attaveqartoqarsinnaavoq.

Isumasioqatigiinnermi kalaallisut tuluttut nutserisoqassaaq.

Avataanit qaaqqusat angalanissatik namminneq akilerpaat.