Allattoq: Inuit Ataqatigiit, Politikkikkut oqaaseqartartuat, Aqqaluaq B. Egede
Nunatsinni suliffeqarfiit sanaartortut Naalakkersuisunit periarfissinneqarlik
Naalakkersuisut sakkortusiartuinnartumik suliffeqarfiit nunatta avataaneersut kisiisa periarfissarsiuussinnaanngilaat. Sanaartorneq sumiiffippassuarni uninngavoq. Aamma massakkut Naalakkersuisut nutaamik piumasaqaateqarput inissiani sanaartorneqartussani sanariaaseq nutaaq piumasaqaatiliullugu nunatsinni suliffeqarfippassuit aningaasarsiorsinnaanerat mattuppaat.
Naalakkersuisut aalajangiinerat nunatsinni suliffissaaleqinerup annertusineranik kinguneqarsinnaanera ernummatigaara. Ilaqutariit arlallit ulluinnarni inuuniarnikkut pitsaanngitsumik sunnerneqarnissaat periariarfissanngussaaq. Nalunngereerparpummi misilittagaqarfigalugulu suliffeqarfiit sanaartortut aningaasanik kaaviiaartitsinerat annikinneruleraangat sulisuminnik soraarsitsiortortarnerat. Isumaqarpunga Naalakkersuisut malartaasiinnaratik aningaasarlu kisiat tunngavigalugu aalajangersaanatik mianersuussassat allat aamma isiginiartariaqaraat.
Suliffeqarfissuit nunatsinni pingasuinnaat Naalakkersuisut piumasaqaataat malillugit sanaartorsinnaasut tusagassiorfitsigut oqaatigineqarpoq. Suliffeqarfiit pingasuinnaat sanaartugassanik annernik kisermaassilissappata ernumanartoraa sanaartornermut akit qaffannissaat. Tamatuma malitsigissammagu atuisut akiliutissaasa qaffasinnerulernerat. Nunatsinni sanaartugassanik suliariumannittussarsiuussisarneq malillugu unammilleqatigiinneq eqaatsoq akikinneqqusaatsitsisarnerlu suliffeqarfinnut ikittuinnarnut atuutilissappat akit qaffannissaat qularutissaanngimmat.
Nunatsinni innuttakitsumi sanaartugassat aningaasaliissutaasarnerat suliffissaqartitsiniarnermut isumalerujussuupput. Naalakkersuisut taamak aalajangernerat qularnanngitsumik aamma kommunit ilaasa akileraarutitigut isertitassaraluaminnik annaasaqaatigissavaat. Suliffeqarfissuit angisuut pineqartut illoqarfinni qitiusoqarfimmiimmata, sanaartukkallu anginerit illoqarfinni anginerni angerlarsimaffeqartuunerat tunngavigalugu aningaasarsiorneq sakkortuumik qitiusumut ”illuariassasoq” qularnanngitsumik pilersinneqartussaalluni.
Inuit Ataqatigiit sinnerlugit Naalakkersuisut kaammattorpagut sanaartoriaaseq immikkuullarissoq kissaatigisimasartik, aamma sulisartoqarnermut attuisussaasoq minnerunngitsumillu sanaartornermik akit qaffaatigisassaat, kommunillu ilaasa akileraarutitigut annaasaqaatissaat pillugit mianersuusseqqullugit. Naalakkersuisut suliffeqarfissuarnik pingasuinnarnik periarfissiiniarnerat navianarluinnartumik kinguneqarsinnaammat ernumassutigaarput. Naalakkersuisut eqqarsaqqittariaqarput, suliassaq annertooq inuiaqatigiinnut pitsaanngitsumik sunniuteqarsinnaasoq nalilersoqqittariaqartorlu tamatsinnut eqquinerloqqunagu.
