Tunumi akerliussutimik takutitsisut paasilluarpagut.
Tasiilami innuttaasut politikkikkut Tunup eqqumaffigineqarnerunissaa anguniarlugu akerliussutsimik takutitsipput. Nuummi aamma tapersiilluni akerliussutsimik takutitsisoqarpoq.
Inuit Ataqatigiit aqutsisui sinnerlugit Tunumi innuttaasut oqariartuutaannut ersarissumut qujanaq.
Nunatsinni innuttaasut sumiikkaluartut tamarmik, assigiinngitsunik oqaaseqartut kultureqartullu nunatsinni inuusaatsikkut tigussaasutigullu ineriartornermi puigorneqannginnissaat Inuit Ataqatigiit pingaartippaat.
Tunumiut oqariartuutaat ersarippoq, nunaqqatigaagut aamma eqqumaffiginerusariaqarpagut.
Ukiorpassuarni Tunumi ineriartortitsineq kingaatsumik ingerlanneqarpoq, tamanna nassuerutigaarput.
Qiningaaffiit kingullermi aalisarnikkut tunitsiveqalernissaq, innaallagissiorfiup allisarneqarnissaa, mittarfiliornissamut pilersaarusiornerit ingerlanneqarput. Peqatigisaanik tunngaviusumik isumaqarpugut Namminersorlutik Oqartussat ingerlatseqatigiiffii inuiaqatigiittut pigisagut inuiaqatigiinnut ineriartortitseqataanissaminnut pisussaaffeqartut.
Nunarput isorartoorsuuvoq, Tunumi kitaanilu inuusaatsigut assigiinngeqaat, piffiillu assigiinnginnerat innuttaasunut nuuttartunut unammillernarsinnaasarpoq. Ilaqutariittut inuuneqarneq suli nunatsinni nukittuujuvoq taamaammallu paasisinnaalluarparput inuusuttut inersimasullu najukkaminni ilinniagaqarsinnaanerat kissaatigineqarmat.
Nunarput ataatsimut isigalugu ineriartortinnissaanut pilersaaruteqarnissaq pingaaruteqarpoq. Aningaasarsiorfissagut ukkattariaqarpagut, aningaasarsiornikkut nunatsinni isorartuumi nammaqatigiinnikkut ineriartorsinnaajumalluta.
Inuussutissarsiutinik ilinniarfissanillu pilersitsineq piffissaq sivisooq atorlugu ingerlasinnaasarpoq, tunngavialu ersarippoq; pilersaarutit aningaasatigullu nunatta nammassinnaasai killeqarmata. Taakkua ilisimaaralugit Tunimi ineriartornermut politikkikkut eqqumaqataanissamut Inuit Ataqatigiit piumassuseqarput.
Innuttaasut sumiiffimminni taakkupput nunaminni ineriartornerup ataavartuunissanik piujuarnissaanillu timitaleqataasussat, suliniuteqarnikkut sumiiffinni eqeersimaarneq sumiiffiup tikikkuminartuuneranut sunniuteqataasarpoq. Manna iluatsillugu Tunumi innuttaasut innuttaasutut sumiiffiup ineriartortinnissaanut suleqataalluarnissaanik kissaakkumavakka.
Ataqqillusi, paasillusi nunaqqatitullu immitsinnut kiinnerfiginissamut oqaloqatigiinnissamullu kajumissuseqarnerput taama ersersipparput.
Nivi Heilmann Efraimsen,
Siulittaasup tullia, ataqatigiissaarisoq
Inuit Ataqatigiit
