Ulloq 01.05.25 aallarnerfigalugu Kommunalbestyrrelsemi ivertinneqarpugut qinikkatut saaffiginnissutit akineqartanngitsut naammagilerpakka.
Qulequttanik assigiingissitaartunik siunnersuuteqartarpunga ulloq manna tikillugu annerusumik akineqanngitsunik aammalu akineqanngivissortunik. Maanna aamma Nanortalimmi kialaarfiup pilersinnissaa siunertaralugu Borgmesteri saaffigisaraluarlugu akineqanngivissorpunga, tamanna uggornarluinnarpoq. Kommunalbestyrelsimi ilaasortatut oqaluuserisassanngortitakka ataatsimiititaliani ingerlareersut piviusunngornissaanut ilaatinneqanngillat, tamanna aamma innuttaasunut uggornarluinnartuuvoq. Sooq taava kommunalbestyrelseqassaagut nammineq kisimi aqutsiniaraanni?
Nanortallip atuarfia oqoqarpoq, suli iliuusissat ersarissut pilersinneqanngillat naak siunnersuuteqarsimagaluarlunga Naalakkersuisunut saaffiginnittoqassasoq. Ukioq naalluinnalerpoq neriullunga siunissami atuarfimmik innuttaasut toqqissisimanartitaannik atuarfeqalerumaartoq.
Ataatsimiititaliani ataatsimiinnissanik kinguartiterineq annertoorujussuusarpoq piffissaq eqqortoq atorlugu ataatsimiinnissaq suli pinikuungilaq. Tamanna aamma akisussaaffimmik tigusinerunngilaq, naak qineqqusaarnermik akisussaaffimmik tigusinissaq oqariartuutigineqaraluartoq.
Innuttaasunik ataatsimiisitsinermi peqataaninni Qaqortup mittarfittaarnissaa pineqartillugu Qaqortoq, Narsaq, Narsarsuarmullu qanoq sunniuteqassanersoq eqqartorneqarpoq ajoraluartumik Nanortalik ataasinnguamilluunniit eqqaaneqarneq ajorpoq, naak kommune kujalleq ataasiusoq illoqarfiit nunaqarfiillu tamarmik kommune kujallermiuulluta. Taamaattorli aqqusernit asfaldterinissaannut Nanortalik siulliunneqassasoq eqqaaneqarluni.
Aningaasaqarnitta killiffanik innuttaasunut saqqummiinermi oqariartuutigineqaannavippoq aningaasanik aqutsinerlunneq aqutsisut siuliisa pilersitarigaat taakkulu Borgmesterip kingornutani anniaralugit, allaallumi 100 mio. kr. akiitsuusut ullumikkut, innuttaasunut ersarissumik takussissiisoqanngilaq aningaasaqarneq qanga ajortumik ingerlalersimanersoq kisitsisinillu ersarissunik innuttaasunut takussutissaqanngitsumik innuttaasunut saqqummiineq akuersaarsinnaangilluinnarpara. Innuttaasunut tutsuiginartunik saqqummiinissaq pingaaruteqarluinnartuuvoq, qinikkat siuliinut isiginerlutsitsisoqarnissaa sulissutigineqarnera tujuminartorujussuuvoq, naak qineqqusaarnermik akisussaaffimmik tigusinissamik oqariartuuteqareeraluarluni. Tamatta qinikkatut akisussaaffigaarput kommunitta aningaasaqarnera pitsaanerulernissaa, kingumut pisuutitsinissamik sulinata siunissamut isigisumik akisussaaffimmik tigusisariaqarpugut.
Innuttaasunik ataatsimiisitsinermi ukiuni kingullerni Nanortalimmi imigassamik ikiaroornartumillu ajornartorsiuteqarnermi katsorsaasoqartannginnera eqqaaneqarpoq tamanna eqqortuungitsoq naqqiissutigerusuppara, ukiut tamarluinnaasa katsorsaaneq ingerlanneqartarpoq ilaatigut ukiumut marloriaq ingerlasarluni aammalu eqqaaneqarluni siusinaartumik iliuuseqartarnemik suliniummik Nanortalimmi peqanngitsoq, tamanna aamma naqqiissutigerusuppara peqareermat, taannalu atorfik ukiuni arlalinni inuttaqarluni. Siuttutut inissisimassagaani innuttaasunut tutsuiginartunik saqqummiisoqartarnissaa aamma akisussaaffiuvoq, tamannalu kivinneqanngippat allanut pisuutitsineq piuassaaq.
Naggataagut kaammattuutigivara Borgmesterip kommunalbestyrelsemi qinikkanik peqataatitsinini annertusassagaa, pissutsit paasissutissallu eqqunngitsut piutillugit oqaloqatigiittarnissamut ammanerunissaq pisariaqarpoq, uanga oqaloqatigiinnissamut piareersimavunga.
Inussiarnersumik
Inuit Ataqatigiit
Pipaluk Jakobsen Larsen.
