TUSAGASSIUUTINUT NALUNAARUT (Narsaq, 31. juli 2025)
Sinerissami nioqqutissanik pilersuineq ajorluinnarpoq.
Pisiassat akitsoraluttuinnartut pisiniarfiit suutaarukkaluttuinnartut:
Nioqqutissat akitsoraluttuinnarnerisa saniatigut nioqqutissanik Pilersuisoqarfiit pilersorneqarnerat, nioqquteqarniarnerat ajorsigaluttuinnarpoq, nioqqutissat tikisinneqartartut ikippallaarput, tikisinneqartut nungupallattut, nioqqutissat tikisinneqartut qinigassat amerlanngitsut, niuertulli niuertitsisullu assorujussuaq ilungersorpasittaraluartut ajornartorsiut sivisuallaammik ingerlavoq.
Pilersuisinnaaneq ingerlaavaraluarpoq:
Illoqarfiit isorliunerusut ilaani sapaatip akunneranut ataasiarluni Royal Arctic Line-ip pajuttaataa tikittaraluartoq taamaattorli nioqqutissat naammattut pissarsiarineqanngisaannarput, amigaateqartuarlutillu ulluinnarni naliginnaasumik atugassaasunik, ulluinnarni pinngitsoorsinnaanngisat tamakkiisumik pissarsiarineqarsinnaajunnaarnikuupput.
Utoqqatsissumiit utoqqatsissummut ingerlatsineq naammatsinnarpoq:
Utoqqatsissummiit utoqqatsissummut ingerlatsineq naammatsinnarsivippoq, akisussaassullu piaartumik iliuuseqarasuarnissaat pisariaqarpoq, isorliunerusuni inuuniarneq sakkortuvoq, nioqqutissat illoqarfissuarniit akisunerusunngorlugit pisiaritinneqartarput, annertuumilli kiffartuusinikkut ajornartorsiornartumik ingerlatsisoqarnera isorliunerusuni inuusunut oqimaatsorsiornermik annerusumik pilersitsivoq.
Aningaaseriveqarnikkut allaat akitsoraluttuinnarput pissakinnerit namminersorlutillu suliffeqarfiutillit eqqornerlunneqarput.
Bankeqarnikkut atugassarititaasunut allaat akitsoriartortinneqarlutik, utoqqalinersiallit taakkukkajupput ulluinnarni bankimik atuisut, aammali namminersorlutik suliffeqarfiutillit atuisuusarput aningaasanik tigusinngikkunik ikisiniarnernerminni atuisuunerli ilanngulluni akitsorneqarpoq.
Nunaqarfiit isorliunerusullu ataannartinnissaat soqutigineqarsimappat iliuuseqartoqartariaqarpoq:
Eqqornerlunneqartartut tassaapput kikkut tamarmik isorliunerusuni najugaqartut, pisisartut atuisut, ukiut tamarluinnaasa akileraartarnermikkut pilersorneqarnissamik akilersueqataasut, nunattami karsia aqqutigalugu KNI-Pilersuisumut kiffartuussinissamik isumaqatigiissutit aqqutigalugit, aammalu Royal Arctic Linep sinerissami nioqqutissanik angallassinissaa anguniarlugu millionerpassuarnik (KNI 23.192 mio RAL 62.090 mio.kr.) aningaasaliiffigineqartarput. Nunaqarfinni inoqarfinnilu inuttunerpaajunngitsuni inuuniarneq sutigut tamatigut oqimaaligaluttuinnartoq oqartussaanerpaaniit oqilisaaffiginiarlugu iliuuseqartoqartariaqarpoq, taamaaliortoqanngippammi isorliunerusuni inuuniarneq oqimaalligaluttuinnartussaammat, tamanna sineriammi kitaaniuppat tunumiuppalluunniit apeqqutaatinnagu iliuuseqartoqartariaqarpoq.
Inuit Ataqatigiit sinnerlugit politikkikkut oqaaseqartartoq.
Mariane Paviasen Jensen
