Piviusoq ilisimasimanngikkaani qineqqusaarnermi ajornanngitsunnguuvoq neriorsuuteqassalluni, tamannami akeqanngilaq.
Piviusorli ilisimaleraanni neriorsuutit oqarluartaarnerit timitaleruminaassilluinnartarput.
Maajip aallaqqaataani kommunalbestyrelse ivertinneqarpoq. Juunimi 2026-imut aningaasatigut tamanit sinaakkutissat akuersissutigineqarput. Taasuma kingorna oqarluaannarluni susoqaqqinngilaq aningaasalerinerup tungaatigut. Aatsaat septemberimi kommunalbestyrelse ataatimiinnerani siullermeerinninnermut atatillugu budgetseminarimut aggersaanermi akunnerit marluk atorlugit aningaasaqarneq eqqartorneqarpoq, ataatsimiititalialli suliassaminnik suli tigussaasumik samminnissimanngimmata isummerfissat nalorninarsimaqaat. Ersarissaasoqarnissaalu noqqaassutigigatsigu kinguartitsinissamik kissaateqarpugut, tamannalu qujanartumik ilalerneqarpoq.
Maanna 45 mio. kr. sinnerlugit ujartortussaavagut qaammat ataaseq affarlu missiliorlugit periarfissaralugit.
Ajoraluartumik nalinginnaavoq ataatsimiititaliani ataatsimiinnerit kinguarteqattaarneqartarneri, ataatsimiissutissat piareeqqannginneri, ataatsimiititaliat siulittaasuisa takkutinnginneri, ilaasortalluunniit pisinnaannginneri pissutigalugit.
Torersumik sulineq kissaatigeqaarput, neriullutalu piffissami aggersumi tamanna ersarissumik pitsanngortinneqarumaartoq.
Maanna qinigaaffik ukiup affaata tungaanut ingerlasimalerpoq, Borgmesteri ataatsimiititaliallu siulittaasuisaluunniit suli nunaqarfinnut illoqarfinnullu innuttaasunik ilassinnikkiartunnginnera aamma maluginiagassaavoq. Maqaasineqarpoq.
Illuatungiliuttutut pisunik tusagassiuutit atorlugit paasissutissinneqartarnerput naammaginngilarput. Aqutsilluarnermiippoq aamma kommunalbestyrelsemi ilaasortanik tusarliisarneq allanut saqqummiussinnginnermi.
Naggataagut aamma taarusunnarpoq, Narsarsuup matunissaanut suliniutinut tunngatillugu, Kommunalbestyrelsemi ilaasortanut peqataatitsineq amigarmat. Qanoq pilersaaruteqartoqarnersoq iluamik ilisimanngilarput, taamallaat meeqqeriviit tungaasigut Qaqortumi aaqqiissutissanik ujartuisoqartoq ilisimavarput. Ineqarnissaat suliffissaqarnissaat qanoq pilersaarusiorneqartoq ilisimanngilarput. Naatsumik oqaatsigalugu Narsarsuarmiut 16 april kingorna sumut qanorlu pineqassanersut ilisimanngilarput. Maanna tusagassiutitigut tusarparput Air Greenlandimi sulisut soraarsitaanissaanik allagarsisimasut. Najugaqartut nalorninersuup iluanniiipput, sumunnassallutik pigisamillu, soorlu ilaqarput illuutilinnik, qanoq pinissaat suli nalornisut. Nunaqarfiup kiammik pilersorneqarnera matusussangortoq, atuarfiit meeqqeriviit matuneqalersut il.il.
Narsarsuarmiut ukiuni kingullerni nunatta kommunittalu politikkikkut siuttuinit isumalluarsaarneqartarnikuupput nunaqarfik siunissagissaartoq mittarfittut atorunnaaruni, tamakkuli oqaatsit nanaak?
Kiisalu qinersivik kingullermi Kommune Kujallermi ataatsimiitsitaliat allanngortippaat Pinaveersaartitsinermut Kultur Sunngiffimmilu ataatsimiitsitaliaq pilersikkamikku. Ulloq manna tikillugu suli Forvaltningschefissamik fagchefissamillu pissarsisoqanngilaq aamma pissarsiortoqarnera ersernerluppoq. Soorlu Kujalliup nittartagaani Inerisaanermut Pisortaanissarsiorput, suliassaasa ataani Pinaveersaartitsinermut Kulturimut Sunngiffimmilu immikkoortortaq aamma pisortaaffigissagaatut paasisariqarpoq. Forvaltningschef pisortaassaaq immikkoortunut marlunnut, taama paasisariaqarpoq. Maannamut immikkoortortatsinni qanoq suleriuseqqarnissaq saqqummiunneqanngilaq. Sulisut pujorsuup iluani sullipput, suna anguniarnerlugu qanoq sulieriaaseqassallutik nalullugu, illoqarfiillu ilaanni pinaveersaartitsinermut kulturimillu suliallit suliassamik ersarissarneqannginnerat pillugu suleqatigiinniarnermik ajornartorsiorput.
Taama pissutsit Kommune Kujallermi taakkartorlugit allagarput nassiupparput.
Inssiarnersumik inuulluaqqusilluta
IA Kommune Kujallermi Gruppeformandi
Ivalo Motzfeldt
