All.: Aqqaluaq B Egede, siul.tullia, ilaas. Inatsisartut & Sofia Geisler, ilaas. Inatsisartut
Pisariaqartumik oqallisigisarialik
Siullermik assut ajuusaarutigivarput oqallisissiaq tunngaviusumik isummernissamik imaqartoq, inuiaqatigiillu ataatsimoorussaannik atuisinnaanermut piumasaqaatinik assigiinngisitsinermik sammisaqartoq, tusagassiuutini sammineqarnerani qulequtserneqarsimammat siunnersuutip siunertaanik saneqqutserujussuartumik.
Atuartut amerlasuut ima isumaqalersinneqarput pisassiissutit aalisartuniit Inuit Ataqatigiinniit arsaarinnissutaatinniarigut, tamannalu ilumuunngilluinnarpoq uniuinerujussuullunilu.
Tusagassiorfiit siunertaat atuutsinneqarnerallu ataqqivarput. Kaammattuutigissavarpulli tusagassiorfiit akisussaaffeqarnerminnik namminneq aamma akuersaartuunissaat, pisuni tamani. Pingaartumillu oqallinnerni pisariaqarluinnaraluartuni, imarisaat saneqquterujussuarlugu qulequtsiisoqarsimatillugu, siunertaa pinnagu massakkoqqissaaq atuartussarsiornermik taamaallaat siunertaqarnera pissutigalugu sangutitserujussuartumik.
Oqallisissiatut siunnersuutikkut siunertarineqarpoq inatsisiliortut Inatsisartut inatsisinillu atuutsussanngortitsisartut Naalakkersuisut innuttaasunik immikkoortitsisisariaqarnersut oqallisigitissallugu. Allaavigisarput tassaavoq soorunami innuttaasunik immikkoortitsisoqassanngitsoq, tamannalu partiit allat aamma isumagissagaat naatsorsuutigivarput. Tamanna ima isumaqarpoq partiit Inatsisartuni inatsisiliornermikkut aalajangiisartut inuiaqatigiit ataatsimoorussaannik atuisitsiniarnermi assigiinngitsumik atugassaqartitsineq tunngaviusumik qanoq isumaqarfiginerlugu isummerfigissagaat.
Neqerooruteqartitsisarneq pillugu inatsimmi ersippoq suliariumannittussarsiortoqartillugu suliffeqarfiit akiligassaareersunik 100.000 kronit sinnerlugit akileraarutinik akitsuutinillu Nunatsinnut nunamiluunniit pilersinneqarfimminni akiitsullit peqataatinneqarsinnassanngitsut. Ukiuni arlalinni tamanna atuutsinneqarpoq pisortat suliassaataannik suliariumannittussarsiornermi. Inatsimmut oqaasertaliussani erserpoq aalajangersakkat siunertarigaat pisortanut akiitsut ikilisarneqarnissaannik kiisalu nutaanik akiitsoqalinnginnissamik tamanna siunertaqartoq.
Illuatungaatigut Naalakkersuisut arlaleriarlutik oqaatigisarpaat aalisarsinnaanermut akuersissutinik qinnuteqartunut piumasariniarnagu pisortanut akiligassaareersunik taakku akiitsoqannginnissaat.
Oqallisissiatut siunnersuutip siunertarivaa assigiinngisitsinerup ilumut taamaattariaqarneranut partiit tunngaviusumik isummernissaat, aammalu aaqqiissutissamik pitsaanerpaamik angusaqarnissamut qanoq immitsinnut naaperiarsinnaanersugut. Inuussutissarsiortut, inatsisiliortut inatsisillu atuutsinneqarnerat pillugu. Minnerunngitsumillu pisortanut akiitsut pinngitsoortinniarnissaat pillugu, tamannalu siunnersuinikkut inatsisiliornikkullu pisariaqarsinnaalluni.
Oqallinneq taanna pisariaqarpoq, piumanngikkaluaruttaluunniit.
Oqallisissiamik saqqummiussisup siunnersuut Inatsisartut marlunngornermiit aallartittumik ataatsimiilernissaanniit tunuartippaa. Tamatumunnga patsisaavoq naalakkersuinikkut pissutsit massakkut inissisimanerat, naatsorsuutigisariaqaratsigu Inatsisartut massakkut ataatsimiinnissaat qinersisoqarsinnaaneranik annertuumik sunnerneqarluni ingerlanneqassasoq. Siunnersuut torersumik oqallisigineqartariaqarpoq. Tamanna pissutaavoq siunnersuutip maannamut tunuartinneqarallarneranik.
