Ulluni kingullerni inoqatinut attaveqaatitigut tusakkat takusallu tunngavigalugit inuit aalassassimaarput, Inatsisartunittaaq pisoq tamanit aamma aalassassimaarutigineqarpoq.
Partiini siulittaasut ataani atsiortugut naqissuserlarput timikkut tarnikkullu persuttaaneq akuersaanngilluinnaratsigu, taamatuttaarlu meeqqap illersugaanera sutigut tamatigut salliutikkatsigu, uniorlugillu pisoqarsimappat iliuutsit tamakku kinguneqartinneqartassammata.
Inatsisartuni ullumi ataatsimiinnermi pisoq tamatsinnut tujorminarpoq, erseqqissallarpulli Inatsisartuni inunnut ataasiakkaanut tunngassutilinnik ammasumik oqaluuserisaqarnissaanut pisinnaatinneqannginnatta, Inatsisartunimi sulineq tassaammat inatsisiliorneq.
Partiini siuttuusugut pissaanerup pingasoqiusanngorlugu agguagaanera ataqqilluinnaqqissaarparput, ilisimaaraarpulli iliuutsit inuiaqatigiinnut sunniuteqartarmata, Inatsisartullu inuiaqatigiinni maligassiuisussaammata.
Partiini siuttuusugut kissaatigaarput suliaq inunnut ataasiakkaanut tunngasoq torersumik ingerlanneqassasoq. Uagut Inatsisartuni inatsisit malillugit sulineq, aamma ilungersunartunik pisoqarsimatillugu, inatsisit malillugit sulinerup ataavartumik ingerlanneqarnissaa qulakkeerinneqataaffigissavarput.
Matumani pisoq alianartoq pillugu ilaqutariit ajornartoortut ikiorserneqarnissaminnillu pisariaqartitsisut kaammattorpavut ikiorserneqarnissamik ujartueqqullugit.
| Inuit Ataqatigiit siulittaasuat | Naleqqap siulittaasua | Atassutip siulittaasua |
| Múte Bourup Egede | Hans Enoksen | Aqqalu Jerimiasse |
