Partiit Inatsisartuniitsitaqartut Parisimi isumaqatigiissut pillugu Kalaallit Nunaata Parisimut isumaqatigiissummut ilanngunnissasa aalajangerpaat.. Tamanna pivoq Nunatta Parisimi isumaqatigiissummut ilanngunnissaa pillugu Inuit Ataqatigiit sukataaruteqarnerisigut
Nunatta Parisimi isumaqatigiissummut ilanngunnissaa Inuit Ataqatigiinnit qineqqusaarutigineqarmat partiit allat tamarmik akerliusimapput. Ukiaaneranili ataatsimiinnermi partiit tamarmiusut isumaqatigiissummut ilanngunnissamik akuersaalernerisa takutippaat; Inuit Ataqatigiit Parisimi isumaqatigiissummut ilanngunnissamik sukataaruteqarnerat iluatsilluartoq.
Suliassap tullia tassaalerpoq; Parisimi isumaqatigiissummut ilanngunnerup kingorna naalakkersuinikkut suliassartai suliarineqarlutik aallartinnerini Inatsisartut malinnaanissaat.
– Silap pissusiata allanngoriartornerani ersiutit uatsinnut tusagaannaanatik piviusuupput. Avannaani ullualuinnaat iluini sikukkut aqqutaasut sungiusimanngisatsinnik aapiloortut naammattoortalerpagut. Aamma ulluni makkunani savaatillik imaannanngitsunik nalaataaqarput. Taamaammat nunatut pisussaaffeqarpugut nunarsuarmioqataasutut mingutsitsinnginnerunissaq anguniassallugu; aamma Nunarput pillugu, Pipaluk Lynge, Inatsisartunut ilaasortaq, pinngortitamillu pingaartitsisuusoq taamak oqarpoq, nangillunilu;
– Mingutsitsinnginnerunissaq pillugu naalakkersuisnikkut aalajangersaanissamut Inuit Ataqatigiit malinnaanissamut immersueqataanissamullu piareersimapput.
Inuit Ataqatigiit tulluusimaarutigaat apeqqummi taamak angitigisumi, innuttaasunit suliffeqarfinniillu eqqumaffigineqarlunilu peqataaffigumaneqaqisumi kisimiissimagaluarluni maanna partiinit tamanit taperserneqarluni inissimmat.
– Qinigaaffimmi atumani Inuit Ataqatigiit takuteqqippaat apeqqutini angisuuni katersuuffiusinnaanini. Aningaasaqarnikkut naalakkersuisuutitaqarnitsinni ataatsimoorfiusarnikuuvugut, aamma peqqinnissamut isumaqatigiissummi partii ataasiinnaq minillugu katersuutsitsivugut. Maanna aamma Parisimut isumaqatigiissumut tunngatillugu katersuutsitsisinnaanerput takuteqqiparput; tamannalu tulluusimaarutigaarput, Pipaluk Lynge oqarpoq, naggasiillunilu;
– Partii aappaluttuuvugut inuit naligiinnerlulernissaannik pingaartitsisut. Aammali qorsuuvugut; piujuartitsinissaq mingutsitsinnginnissarlu pingaartitaraagut. Nunatsinnittaaq aamma naalakkersuinikkut nikeriartiniarnermi, innuttaasullu inuunerannik oqilisaarusulluni siunertaqarnermi politikerit imminnnut tusarnaarnerulerlutillu naaperiaassuseqaleriartornerat qiningaaffimmi matumani ersertoq iluarisimaarpara.
