Inuit Ataqatigiit Folketingimi Kalaallit Nunaat pillugu ataatsimiititaliaq peqatigalugu Danmarkimi naalakkersuisunik isumaqatigiissuteqarpoq pinerluttuliornernit eqqugaasunut siunnersuineq Kalaallit Nunaanni pilersinneqassasoq. Kalaallit Nunaanni ukiuni 25-ni utaqqineqareerluni pinerluttuliornernit eqqugaasunut siunnersuisarfeqalernissaa qilanaarineqarsinnaalilerpoq.
Kalaallit Nunaanni pinerluttuliornermit eqqugaasunut siunnersuisoqarfeqalernissaq pillugu aalajangiiffigisassatut siunnersuut Folketingimi qanittukkut oqaluuserineqarpoq. Siunnersuut Inuit Ataqatigiinnit Aaja Chemnitzimit saqqummiunneqartoq Naalakkersuisut pingaarnersiukkanik allattugaataannut sivisuumik ilaasimavoq, tamannalu pinerluttuliornerniit ajunaarnerniillu eqqugaasut qanigisaasullu tapersersorlugillu siunnersorneqartarnissaasa qulakkeerneqarnissaannik siunertaqarluni.
”Inuit Ataqatigiit eqqugaasut tapersersorpaat. Inuiaqatigiinni eqqugaasut, pinerluttuliornernit ajunaarnerniillu kingunerlutsinneqarsimasut ukkatarinerujussuusariaqarpavut. Inuiaqatigiittut pinerluttuliornernik akuersaannginnerput kiisalu eqqugaasut qanigisaasunullu nakuusernernit, innarlerneqarnernit allatulluunniit kingunerlutsinneqarsimasunut kisimiinnginnerannik, kisiannili ikiorniarlugit ataatsimut tapersersuinitsinnik takutitsinissarput aalajangiisuuvoq. Inummut ataatsimut aningaasaliinerinnaanani inuiaqatigiinnut tamakkiisumik aningaasaliineruvoq,” Aaja Chemnitz oqarpoq.
Siunnersuut Folketingimi siammasissumik tapersersorneqarpoq, qanorlu iliornissamik Inuit Ataqatigiinniit Kalaallit Nunaat pillugu ataatsimiititaliaq peqatigalugu Danmarkimi naalakkersuisunik isumaqatigiissuteqaqqammerpoq. Kalaallit Nunaanni pinerluttuliornernit eqqugaasunut siunnersuisarfimmik nunatsinni inuiaqatigiinnut naleqqussakkamik sukkanerpaamik qanoq pilersitsisoqarsinnaanera pillugu Danmarkimi naalakkersuisut Folketingip ukiua matuma naannginnerani pilersaarusiussapput. Taamaammat eqqugaasunut qanigisaasunullu tapersersuillunilu siunnersuinissamut piareersimasumik ungasinngitsukkut pinerluttuliornernit eqqugaasunut siunnersuisarfeqalernissaa naatsorsuutigineqarpoq.
Aaja Chemnitz oqarpoq: ”Kalaallit Nunaanni pinerluttuliornernit eqqugaasunut siunnersuisarfeqalernissaa Naalakkersuisut peqatigalugit ilungersuutigaara. Ukiuni 25-ni utaqqineqareerluni Kalaallit Nunaanni pinerluttuliornernit eqqugaasunut siunnersuisarfeqalernissaanik Danmarkimi naalakkersuisut kiisami isumaqatigiissuteqarfigigatsigit nuannaarutigaara. Eqqugaasut ukkatarinerullugit nunatsinni inatsisitigut inuit illersugaanerisa ineriartortinneqarnerannik tamanna angusaavoq pingaarutilik.”
Aaja Chemnitzip naalakkersuisut Kalaallit Nunaannik, pingaartumik inatsisinik atuutsitsinermut tunngatillugu, salliutitsinissaannik tatisinini attanniarpaa. Inuit Ataqatigiit Folketingimi amerlanerusunik siunnersuuteqarnissaat Danmarkimi naalakkersuisunit taamaammat naatsorsuutigineqarsinnaavoq.
”Naalagaaffeqatigiinnermi assigiinnik pitsaassuseqartariaqarneranik Danmarkimi naalakkersuisut anguniagaqarlutik nalunaaruteqarsimanerat eqqortinniassavarput. Naalakkersuisut taamannak aamma isumaqartut nalunngilara. Inuiaqatigiinni pisariaqartinneqartumik kalaallillu innuttaasut tapersersorsinnaasaannik inatsisinik atortitsinerup ullutsinnut naleqquttuunissaata qulakkeernissaa taamaammat ilungersuutigiuassavara,” Aaja Chemnitz oqarpoq.
