Aaja Chemnitzip, Inuit Ataqatigiit, ulloq 14. januar 2025 Kalaallit Nunaanni pinerluttulerinermut aamma eqqartuussiveqarnermut inatsisit allanngortinneqarnissaannut siunnersuut(Malersugaanermut, iliuuseqarneruneq, kinaassutsimik atornerluinerup pinerlunninngortinnissaa unnerluussuteqarnissamut piffissaliussamik unitsitsineqil.il.).
Qujanaq oqaaseqarsinnaagama.
Inatsisissatut siunnersuutip ullumi oqaluuserisatta suliarinissaa sivisuumik qilanaarisimavarput. Inatsisartuni oqaluuserineqareerpoq siammasissumillu tapersersorneqarluni akuerineqareerluni. Inatsisissatut siunnersuut malersugaanermut iliuuseqarnerunissamut kinaassutsimillu atornerluinermut akiuiniarnermut pingaarnertut pitsanngorsaassaaq. Ullumikkutut itsillugu imatorsuaq pinerlunnertut inissisimatinneqanngillat taamaammallu isumaqarpunga pinerluttut akisussaatinneqarsinnaanissaat pingaaruteqartoq.
Malersugaaneq sakkortuumik pinerlunneruvoq pinerlineqartup inuuneranut ulluinnarnilu inuuneranut sunniutilerujussuaq, tamatumalu pinerlunninngortinneqarnissaa IA-mit ukiorpassuarni ilungersuutigisimavarput. Suliaq tamanna IA’p pingaartitaraa. Ajoraluartumillu aamma inoqatinut attaveqaatini arlalinnik ajornartorsiuteqarnera aamma takusarparput, taamaammallu nuannaarutigaarput malersugaaneq kinaassutsimillu atornerluineq pinerluttunngortillugit immikkut iliuuseqartoqarmat. Ilutigitillugu isumaqarpugut pinaveersaartitsinikkut pinerluuteqartullu nutaamik pinerlunnissaraluat pinaveersaartinniarlugu pisariaqartumik ikiorneqarnissamik neqerooruteqarfiginerisigut pinerlineqartut inatsisitigut innarlitsaaliorneqarnerat pitsaanerulissasoq. Inuit tarnikkut nappaatilinnut napparsimmavinnut inissinneqarsimasut aninissaannut malittarisassanik aalajangersaanissamut oqartussaassuseqalersitsineq pitsaasutut isigaarput.
Naggasiutigalugu oqaatigissavara inatsisinik atuutsitsinermi Naalakkersuisut sivisuumik kissaatigisaat salliunneqarsimanera nuannaarutigigatsigu. Taamaattoqarnera Danmarkimi naalakkersuisunit ingerlatiinnarneqarnissaa neriuutigilluinnarparput. Taamatut oqaaseqarlunga Inuit Ataqatigiit tapersiipput.
Qujanaq.
