Aaja Chemnitzip, Inuit Ataqatigiit, allaatigisaa Sermitsiami ilanngunneqartoq
Eqqartuussissuserisut siunnersuisoqatigiiffiata, Advokatrådip Kalaallit Nunaanni inatsisitigut innarlitsaalisaaneq pillugu nalunaarusiaata nutaap takutippaa, kingullermut sanilliullugu arlalinnik pitsanngoriaateqarsimasoq, akerlianilli aamma oqaatigalugu suli suliassarpassuaqartoq.
Kalaallit Nunaanni inatsisitigut innarlitsaalisaaneq pillugu Advokatrådip nalunaarusiaani nutaami qaangerniagassat ilisarnartut amerlapput. Tunngaviusumik pisinnaatitaaffiit inatsisinik tunngaveqarluni inuiaqatigiinni ataqqinassuseqartuni tamani innuttaasuminut neqeroorutigisinnaasariaqagaat amigaataanerat nalunaarusiami ersarilluinnartumik saqqummiunneqarpoq. Tamanna assersuutigalugu pinerluttulerinermik suliani eqqugaasunut tapersersuillutillu siunnersuinermik suliaqartussanik eqqartuussissuserisumik ikiorteqarsinnaanermik aaaqqiissummi atuuppoq.
Inatsisinik atuutsitsinermut suliassaqarfiup piffissap ingerlanerani ineriartornerani Naalakkersuisut kalaallillu Folketingimi ilaasortaatitaasa tatisiuartariaqarnissaannik pisariaqartinneqarsimavoq. Inuit Ataqatigiit Folketingimi aningaasanut inatsimmi inatsisinik atuutsitsinermut arlalinnik aningaasaliissuteqartitsisarsimavoq. Suliniuterpassuit, soorlu pinerlineqarsimasunut siunnersuineq, qimmit ikiaroornartunik ujaasisartut kiisalu politiit akissaataasa naligiissinneqarnissaat Danmarkimi naalakkersuisunit namminerisamik iliuuseqarfigineqaratik, akerlianilli Naalakkersuisut peqatigalugit ilungersuuteqarluta aatsaat angusimallutigu. Tamanna naammaginanngilaq ilumoorunilu Danmarkimi naalakkersuisut nunani tamalaani najoqqutat akuerisat malillugit inatsisinik atuutsitsinermut suliassaqarfiup ullutsinnut naleqquttuunissaata qulakkeernissaa nammineq akisussaaffigaat.
Innuttaasut eqqartuussiveqarnermik tatiginninnissaat pingaaruteqarpoq Advokatrådillu qanoq pitsanngorsaasoqarsinnaaneranut Kalaallit Nunaanni inatsisitigut innarlitsaalisaaneq pillugu nalunaarusiaani kingullermi innersuussuteqarluni.
Siuarsaaneq
Eqqartuussiveqarnerup tamarmiusup siuarsarneqarnissaa Advokatrådimit innersuussutigineqarpoq. Inatsisinik atuutsitsinermik suliassaqarfimmi suliaqartut pikkorissut ullullu tamaasa annertuumik suliniuteqartut akuersaarnissaat pingaaruteqarpoq. Eqqartuussiveqarnitsinni taakku ingerlatsisuupput qitiusumillu suliaqartut akornanni taamak annertutigisumik atajuartoqarmat iluatsitseqaagut. Inuiaqatigiinni inatsisit tunngavigalugit ingerlatsiviusumi aalajangiisuulluinnarput.
Inatsisitigut innarlitsaalisaaneq tatiginninnerlu amerlasuuni paasinninnermiillunilu iliuuseqarnermiippoq. Suliami inuunermik allannguinermik nassataqarsinnaasumi inatsisitigut innarlitsaalisaaneq imaluunniit suliap pitsaassusaa apeqquserneqarsinnaassanngilaq. Pinerluttulerinermik suliami annertuumi unnerluutigineqarsimasut tamarmik taamaammat minnerpaamik ilinniarsimasumik sinniisoqarnissaq naatsorsuutigisinnaasariaqarpaa. Tamanna eqqartuussiveqarnermik tatiginninnermut pingaaruteqarpoq.
Siuarsaanerli maanna pitsaalluinnartumik suliniutigeriikkatta qaavatigut sanarfineqassaaq. Tamanna assersuutigalugu eqqartuussisunik inatsisitigut ilinniaqqinnissamik neqerooruteqarnikkut pisinnaavoq. Ilisimatusarfimmi inatsisilerinermik ilinniarfittaaq aqqutigalugu eqqartuussiveqarnermi atorfinnut assigiinngitsunut ilinniarsimasunik tunniussaqarsinnaalerumaarpugut. Innuttaasugut nammineq ilinniartissinnaagatsigit nuannaarutigaara. Taamaalilluta innuttaasut eqqartuussiveqarnermut tatiginninnerat annertusarsinnaavarput ilutigitillugulu qanittumiinnissamik tunngaveqarneq inuiaqatigiinnik sanarfinitsinni tunngavigisarput attassinnaassallutigu.
Amerlisaaneq
Inatsisinik atuutsitsinermut suliassaqarfimmut tatiginninnerput inatsisitigut innarlitsaalisaanermut aamma tunngaveqarpoq, tamannalu pinerluummit sunniutinut attuumassuteqartoq oqartoqarsinnaalluni. Inatsisitigut innarlitsaalisaaneq innarlerneqarsinnaavoq ilaatigut pineqaatissiissutit sakkukippallaarpata imaluunniit pinerluuteqarsimasunut inissiisarfinnut utaqqisut allattorsimaffiat takivallaarpat.
Inuiaqatigiinnut akuleruteqqinnissamut inatsisitigullu innarlitsaalisaanermut pineqaatissinneqarsimasut eqqartuunneqarnerminnik sukkanerpaaq atorlugu atuisinnaanissaat pingaaruteqarpoq. Inuiaqatigiittut eqqugaasimasut pinerliisuminnik naapitsinissamut ersillutik inuuneqarnissaat akuerisinnaanngilarput.
Advokatrådimit innersuussutigineqarpoq pinerluuteqarsimasunut inissiisarfiit amerlanerusunik tigusisinnaalersinneqassasut, tamatumani kinguaassiuutitigut pinerluuteqarsimasutut pineqaatissinneqarsimasunut katsorsaavik Inussuk ilanngullugu. Innersuussut sivisuumik ilungersuutigisimasara justitsministerimillu oqaloqatigiissutigileriigara.
Advokatrådip kingullermik 2016-imi nalunaarusiorneranit suli suliassarpassuaqarnerput akuersaassallugu pingaaruteqarpoq. Inatsisinik atuutsitsinermut suliassaqarfiup Danmarkimi naalakkersuisunit salliunneqarnerunissaa Inuit Ataqatigiit sivisuumik ilungersuutigaat innersuussutigineqartullu arlaqartut aamma ingerlapput. Anguniagarput angutserlugu Danmarkimi naalakkersuisunut ilungersuuteqartuassaagut. Naligiimmik atugassaqartinneqarneq assigiimmik pisinnaatitaaffeqarnermik aallartippoq.
