Oqaaseqartartoq Aaja Chemnitz, Inuit Ataqatigiit, ulloq 2. oktober 2024
Kalaallit Nunaanni eqqartuussiveqarnermut inatsisip allanngortinneqarnissaannut inatsisissatut siunnersuut ip L 20-p siullermeerneqarnera (Allagaatinik takunnissinnaaneq, pinerluttulerinermi pinngitsaalisamik iliuuseqarneq, takunnittut kinaanerannik isertuussineq, digitalimik pisariinnerusumillu digitalimik nalunaajaaneq kiisalu inatsisinik unioqqutitsinernik misissuinermut atatillugu isertortumik sulisunik politiinik atuisinnaanerat il.il.).
Inatsisissatut siunnersuut ullumi oqaluuserisarput aallarniutigalugu inatsisissatut siunnersuutit marluusimapput. Taakku tamarmik Inatsisisartuni siammasissumik tapersersorneqarlutik akuerineqarsimapput.
Inuit Ataqatigiit Folketingimi inatsisissatut siunnersuummi immikkoortut aqqaneq marluk tamaasa tapersersorpaat. Politiinit eqqartuussivinniillu kissaataapput arlaqartut, soorlu aamma Kalaallit Nunaanni Eqqartuussivimmit atuutilersinneqarnissaat innersuussutigineqarsimasoq.
Inatsisissatut siunnersuummi siunertarineqarpoq politiit annertusisamik misissuinissamut periarfissaqalernissaat illuatungaanilu eqqartuussivinni ammanerunissap qulakkeerneqarnissaa.
Allannguutit taamak amerlatigisut oqaluuserisariaqarmata sivisuumik oqaluuserisimasatsitut kinguaattoornermut takussutissaavoq. Sammisat oqaluuserisatta ilarparujussui ukiut 20-it sinnerlugit allanngortinneqarsimanngillat.
Kalaallit Nunaanni pinerlunneq siooranartullu taamanimiilli allannguuteqarsimapput. Ilaatigut digitalimik pinerlunnerusoqalersimavoq ikiaroornartumillu aaqqissuussamik pinerlunnerusoqalerluni. Inatsisissatut siunnersuut eqqartuussisoqarnermi inatsimmik ullutsinnut naleqqussaanissamik qulakkeerinniinnarani suliassaqarfiup kinguaattooqqajuaannannginnissaa pillugu siunissamut qulakkeerneqarnissaanut aamma tunngassuteqarpoq.
Tassunga atatillugu politiit pinerlunnernik paasiniaanissamut malersuinissamullu pisariaqartinneqartunik sakkussaqarnissaasa qulakkeerneqarnissaa pingaaruteqarpoq. Inatsisinik atuutsitsinermi tunngaviusoq kisimi pinnagu isumalluutinut aamma tunngavoq.
Inoqarfiit tikinneqarsinnaanerat sullinneqarnerallu ilungersunartoq ilisimavarput. Kommunefogedit amigaataakkajupput Naalakkersuisullu tamatuminnga atorunnaarsitsinissamik kissaateqarsimallutik. Kalaallit Nunaat tamakkerlugu toqqissisimaneq qulakkeerniarlugu politiit angallataat, politeeqarfiit politiillu amerlanerusut pisariaqartinneqarput.
Inatsisissatut siunnersuut ullumi oqaluuserisarput ilaatigut illersuisup unnerluutigineqartullu allagaatinik takunnissinnaanerannik ilaatigut killiliissaaq. Ilutigitillugu allat allagaatinik takunnissinnaanerannik annertusaasoqassaaq. Eqqartuussivinni ammanerusumik ingerlatsisoqalissaaq, tamannalu tikilluaqquarput.
Inatsisissatut siunnersuummi oqarasuaatikkut nakkutilliinernut, takunnittut kinaanerannik isertuussinernut misissuinermilu isertortumik misissuisartunik atugaqarsinnaanermut ersarilluinnartunik aamma malittarisassaqalissaaq.
Misissuinermi periarfissaqarnerulernerup inatsisitigut innarlitsaalisaanermut ajornerulersitsinnginnissaa pingaaruteqarluinnarpoq. Nukipparujussuit akisussaaffeqarnerulersitsisarput. Akulerunnerillu tamarmik annertussutsimikkut naapertuunnissaat anguniagaqarnissaallu pingaaruteqarpoq.
Eqqartuussiviit, politiit unnerluussisussaatitaasullu digitalimik attaveqaatinik atuisinnaanissaasa inatsisitigut tunngavissaat aamma qulakkeerneqarpoq. Oqartussaasunit sivisuumik ujartorneqarsimavoq atortussallu eqqartuussiviit pillugit isumaqatigiissummi qulakkeersimasavut inerisarneqaleruttorput.
Pisinnaatinneqarnerulernerup isumalluutinik malitseqartinneqarnissaata qulakkeernissaa nalinginnaasumik pingaaruteqarpoq. Tamatumani nalunaajaanermik suliassat allagaatinillu takunnissinnaaneq immikkut eqqarsaatigaakka. Nunatta Eqqartuussisuuneqarfianit oqaatigineqarpoq nalunaajaasarnermik suliassaq tigussagunikku isumalluutit amerlanerusut pisariaqartissagitsik Nunatsinnilu Eqqartuussiviit allagaatinik takunnissinnaanermik suliaqarnermut atatillugu assinganik isumaqarlutik. Tamanna Danmarkimi naalakkersuisunit massakkut qulakkeereerneqartariaqarpoq.
