Folketingimi ilaasortamit Aaja Chemnitzimit, Inuit Ataqatigiit aamma Inatsisartuni Nunanut Allanut Sillimaniarnermullu Ataatsimiititaliap siulittaasuanit Pipaluk Lyngemit, Inuit Ataqatigiit, tusagassiorfinnut nalunaarut
Illersornissaq pillugu isumaqatigiinniarnerit ilaat pingajuat Folketingimi ukiaq manna isumaqatigiinniutigineqassaaq, taannalu Issittumut Naalagaaffeqatigiinnermullu tunngassuteqassalluni. Kalaallit Nunaalli suniarpa? Tamanna Issittumi Sillimaniarneq pillugu Kangerlussuarmi ulluni 17.-19. septembari ataatsimeersuarnermi sammineqarpoq.
IA’p Folketingimi ilaasortaatitaa Inatsisartuni Nunanut Allanut Sillimaniarnermullu Ataatsimiititaliap siulittaasua Pipaluk Lynge, Inuit Ataqatigiit, aamma ataatsimiititaliami ilaasortaq Kuno Fencker, Siumut, peqatigalugit Issittumi Sillimaniarneq pillugu ataatsimeersuarnermi Kangerlussuarmi ingerlanneqartumi peqataavoq, illersornissaqarfiup suliassanik isumaginninnera minnerunngitsumillu Kangerlussuup siunissaa oqaluuserineqarlutik.
Aaja Chemnitzimit oqariartuutigineqarpoq: “Isumaqatiginninniarnerni suliniutit nunatsinnut iluaqutaasut iluatsissagutsigit Danmarkimut ersarissumik oqariartuuteqartariaqarpugut. Nunatta illersornissaqarfiullu akornanni soqutigisat qaleriippata tamanna tamanit iluaqutigineqassaaq. Kangerlussuup siunissami qitiusumik atuuffeqarumaarnera upperaara “.
Søkabeli nutaaq, Kangerlussuarmi dronenik nutaanik inissiineq kiisalu Kangerlussuup Sisimiullu akornanni pitsaanerusumik aqqusinniorneq Aajap aalajangersimasumik tikkuarpai, kisiannili aamma timmisartut umiarsuillu nutaat Kalaallit Nunaanni akeraasinnaasut ingerlataqaratarsinnaanerannik pitsaanerusumik takunnissinnaanissamut aalajangiisuusut oqaatigalugit.
“Nakkutilliineq ullumik amigarpoq Kalaallit Nunaatalu illersorneqarneranut annertuumik aningaasaliisoqartariaqarluni ilaatigut nunatsinni suliffeqarfiit suliassanik isumaginneqataalersinnerisigut. Taamaalilluta nunatsinni suliffinnik pilersitsissaagut ilisimasaqarnerulerlutalu. Nunarsuarmioqatitsinni nalorninartoqarnerata nalaani eqqissinermik attassinissaq siunertaavoq” Aaja Chemnitz, Inuit Ataqatigiit oqarpoq.
Inatsisartuni Nunanut Allanut Sillimaniarnermullu Ataatsimiititaliami siulittaasoq Pipaluk Lynge ilassuteqarpoq: “Qaqqanik sisoortunik aamma nakkutilliinerusoqalissaaq, tamannalu ilaatigut illersornissaqarfiup dronesa siunertanut arlalinnut atornerisigut pisinnaalluni. Silap allanngoriartornera ilutigitillugu qaqqat sisoorsinnaanerat aarlerinaateqaleraluttuinnarput tamannalu isumannaallisaanitsinnut navianartorsiortitsilluni. Dronet sineriatsinnik imartatsinnillu nakkutilliinermut aamma atorneqarsinnaapput.”
Illersornissaqarfiup Kalaallit Nunaanni suliai pillugit isumaqatigiinniarnerit ukioq manna naammassineqarnissaat naatsorsuutigineqarpoq.
