Kalaallit Nunaanni inatsisinik atuutsitsineq Danmarkimit akisussaaffigineqarpoq sivisuumik sumiginnarneqarsimasoq. Kinguaattoorujussuarnermik nassataqarpoq Kalaallit Nunaannilu eqqartuussiveqarneq ullutsinnut naapertuutissappat massakkut iliuuseqartoqartariaqarluni.
Kalaallit Nunaanni inatsisinik atuutsitsineq tatisimaneqarpoq. Pinerlunnerit amerlavallaarnerat, inatsisit pisoqalisut, suliassat amerlanerujussuat, utaqqisunut allattorsimaffiit takisuut digitalinngorsaanerullu amigaataanera qaangerniagassani assersuutit ilamininnguariinnarpaat.
Naalakkersuisut ukiut tamaasa Justitsiministeriamut saaffiginnissuteqartarpoq inatsisinik atuutsitsinerup iluarsinissaanut iliuuserineqartariaqartunik allattugaateqarluni, akuttunngitsumilli salliunneqarneq ajorput. Tamatuma nassatarisaanik inatsisinik atuutsitsineq sorpassuartigut pisoqalisimavoq. Inunnut tunngatillugu assersuutigalugu eqqartuussivikkoortumik nalunaarsuineq pappilissatigut ingerlanneqarpoq, aali Danmarkimi ukiut qulikkaat sinnerlugit tamanna digitalinngorsarneqarsimagaluartoq sipaaruteqangaatsiarnermik nassataqartumik. Tamanna soorunami Kalaallit Nunaanni aamma atuutilersinneqassaaq.
Pineqaatissiisarnermik suliaqarfimmi suliaqartut amerlasuut inatsisitigut ilinniagaqanngitsut takusinnaavavut. Tamanna amerlasuunit uppernanngitsutut isigineqarsinnaavoq, kisianni atorfinitsitsiniarnermik ajornartorsiuteqarneq qanittumiinnissamillu tunngaveqarnerup pingaartinneqarnera pissutigalugu ilaatigut Kalaallit Nunaanni nammineq illersuisutut eqqartuussisutullu ilinniarfimmik pilersitsinissaq pisariaqartilersimavaa. Ullut tamaasa pisinnaassuseqarlutik sulisaraluartut inatsisitigut innarlitsaalisaanikkut eqqarsarnartoqarnera avaqqunneqarsinnaanngilaq. Pineqaatissiisarnermik suliaqarfimmi taamaammat ilinniarsimasunit ingerlanneqalernissaa taamaammat sulissutigineqartariaqarpoq ilaatigut inatsisitigut ilinniarfinnik neqerooruteqarnikkut. Inatsisitigut innarlitsaalisaanermik tamanna pitsanngorsaassaaq pinerluttulerinermilu inatsimmi tunngavigineqartoq qanigisamiinnissamik tunngaveqarneq attanneqarluni.
Qanigisamiinnissamik tunngaveqarnerup saniatigut pinerluttulerinermi inatsimmi iliuuseqartoq aallaavigineqartarpoq. Inuiaqatigiit nutaaliaasut ineriartorneranni innuttaasullu inatsisitigut innarlitsaalisaanermik misigineruleriartornerat ilutigalugit pinerluutip pineqaatissiissutillu naleqqunnerulernissaannik pinerlineqartullu isiginiarneqarnerunissaannik kissaateqarnerujartortoqarpoq. Sivisuumik taamaammat oqaluuserineqarsimavoq pineqaatissiisarnermi killiliussat ukiunit qulinit 16-inut amerlineqarnissaat. Suliani ajornerpaani eqqartuussiviit iliuuseqarnerusinnaalissapput killiligaanngitsumillu parnaarunneqarnissamik eqqartuussinerit ikilineqarlutik taamalu naleqqersornerulerlutik. Inatsimmilli allannguut suli akuerineqanngilaq tamanna inissiisarfinni inissanut ajornartorsiortitsilissammat.
Kalaallit Nunaanni innuttaasut 100.000-iugaangata inissiisarfinniittut 225-upput. Europami amerlanerpaanut ilaapput Danmarkimullu sanilliullugu pingasoriaammik amerlanerullutik. Taamaakkaluartoq inissiisarfinni inissat ukiuni kingullerni ikilisimapput. Utaqqisut taamak amerlatigimmata naalakkersuinikkullu sammivimmut tamanna naapertuutinngilaq. Inissat amerlineqarnissaannut periarfissat taamaammat misissorneqartariaqarpoq. Ilutigitillugu pinaveersaartitsinermik suliniutit kiisalu katsorsaanissamik suliffissaqarnikkullu neqeroorutit ukkatarineqassapput, inissiisarfinniittut ikilisarniarlugit innuttaasunullu akuuleqqinnissamut atugassarititaasut pitsanngorsarniarlugit.
Suliassat amerlapput kinguaattooqqanerlu iluarsiniarlugu sivisuumik ilungersuuteqarnissaq qularutissaanani, kisianni iliuuse qanngikkutta kinguaattooqqaneq ajorneruliinnassaaq. Naalagaaffeqatigiinni malitassat assigiit atuuttariaqarput. Kalaallit Nunaanni inatsisinik atuutsitsineq salliunneqartariaqarpoq Danmarkimilu naalakkersuisut inatsisinik atuutsitsineq ullutsinnut naapertuuttoq inuiaqatigiit kissaataannik naammassinnittoq qulakkeerniarlugu akisussaaffimminnik tigusisariaqarput.
-mit suliarineqarpoq
