Aaja Chemnitzip, Inuit Ataqatigiit, Kalaallit Nunaanni eqqartuussiveqarnermut, pinerluttulerinermut, uppernarsaatinut kiisalu katissimanerup inatsisitigut atuutsinneqarnera pillugit inatsisit Kalaallit Nunaanni atuutsinneqartut allanngortinneqarnissaannut siunnersuut pillugu oqaaseqaataa ulloq 17. decembari 2024 siullermeerneqarmat(Eqqartuussivinnut ukiunut arlalinnut isumaqatigiissutip 2024-27 ilannik atuutilersitsineq).
Qujanaq oqaaseqarsinnaagama.
Uteqattaarerujussuassanngilanga pitsaasunimmi kusanartunillu amerlasuunik oqaaseqartoqareerpoq, IA’miillu isumaqatigiissut una Danmarkimi naalakkersuisut Folketingimilu partiit akornanni isumaqatigiissutigineqartoq isumaqatiginninniarnernilu peqataaffigalugulu tapersersorsimasarput nuannaarutigeqaarput. Isumaqatigiissut pisariaqartinneqavissimavoq, soorlu tamanna aamma oqaatigineqartoq. Kalaallit Nunaanni eqqartuussiveqarnermi suliat qaleriiaarput, suliat sivisuumik suliarineqartarput IT-millu ikorfartuutit amigaataasimallutik, taamaammat amigaataasimaqaaq. Taamaammat nuannaarutigisorujussuuarput.
Inatsisissatut siunnersuut Inatsisartuni aamma oqaluuserineqarsimavoq siammasissumillu tapersersorneqarluni akuerineqarluni, taamaammat ajunngilluinnarpoq. Inatsisissatut siunnersuummi immikkuualuttut iserfiginianngilakka, oqaatigiinnarusupparalu Kalaallit Nunaanni nuannaarutigeqigatsigu eqqartuussivikkoortumik nalunaarsuineq ukiuni 15-init sivisunerusumik utaqqereerlugu digitalinngorsarneqassammat. IA’mit tamanna ukiorpassuarni ilungersuutigineqarsimaqaaq. Tamatumunnga qujanaq.
Kisianni – tassami angisuumik kisiannertaqarpoq – inatsisissatut siunnersuummi digitalimik imminut sullissivik danskisut taamaallaat atorneqarsinnaanissaa siunniunneqarsimammat. Eqqarsarnarpoq tassami Kalaallit Nunaanni oqaatsit inunnguuseralugu atorneqartut tassaapput kalaallisut Kalaallit Nunaannilu innuttaasut affaasa missaat danskisut oqalussinnaanngillat. Aalajangerneq tusarniaanermi akissutini Naalakkersuisunit aamma Inuit Pisinnaatitaaffiinut Siunnersuisoqatigiinnit sakkortuumik isornartorsiorneqarsimavoq, taamaammallu aalajangiunneqarluni digitalimik eqqartuussivikkoortumik nalunaarsuineq atuutilersinneqassanngitsoq Naalakkersuisunit akuerineqartumik aaqqiissutissarsisoqartinnagu. Tamanna taamaammat erseqqissaatigissavara. Systemip kalaallisut aamma inerisarneqarnissaa pingaaruteqarpoq. Inuit Ataqatigiinnut pingaaruteqarpoq systemi Kalaallit Nunaanni innuttaasunut tamanut atugassianngortinneqassasoq kalaallisut danskisullu, systemilu tamanit atorneqarsinnaanissaa periarfissaassasoq. Taamaammat isumaqarpugut eqqarsarluanngitsoortoqarsimasoq Kalaallit Nunaanni kalaallisut aamma atorneqarsinnaanissaa eqqumaffigineqarsimanngimmat. Kisianni soorunami neriuutigaarput pitsaasumik aaqqiissutissarsisoqassasoq, Danmarkimilu naalakkersuisut naligiinnissamik isumaqatigiissummik naammassinnissasut sukkanerpaamillu kalaallisut danskisullu inerisaasoqassasoq. Taamatut oqarlunga oqarsinnaavunga inatsisissatut siunnersuummik IA tapersersuimmat Enhedslistenimiillu tapersersuinerannik aamma inuulluaqqussuteqarlunga.
Qujanaq.
