Atlantiku qulaallugu timmisartunut Nuummi mittarfeqalernera siunissamilu Ilulissani mittarfeqalertussaanera pillugit ilinniartut Kalaallit Nunaannut angalasinnaanerat IA-mit ajornannginnerulersinneqarusuppoq siumut utimullu 1.000 kr.-mik nammineq akiliilluni akikitsumik neqerooruteqarnikkut.
Angalanerup akisunerpaartaata tamanut akikinnerulernissaa siunertarineqarpoq. Imaappoq Maniitsumi, Sisimiuni imaluunniit illoqarfimmi allami nunaqarfimmiluunniit najugaqaraanni angerlamut apuunnissaq ullumikkornit akikinnerussaaq.
Kalaallit Danmarkimi ilinniartut amerlanerpaartaasa atugarliornerannik takutitsisumik Inuit pisinnaatitaaffii pillugit Instituttip nalunaarusiaa tunngavigalugu billettit pilersinneqarput. Timmisartornissamut billettit akikitsut angerlarsernermik annikillisaanermut Danmarkimilu ilinniartuunermi nalaani nunagisamut atassuteqarnerulernissamut iluaqutaassapput.
Aaqqiissut massakkuugallartoq Nuummut atuuppoq Kalaallit Nunaanni atlantiku qulaallugu timmisartunut pingaarnertut ullumimiit mittarfiussammat. Soorlu Kangerlussuaq aamma taamaassimasoq mittarfik Danmarkimit timmisartuussinernut katersuuffiugallarmat. Suliniutip ilinniartunut sapinngisamik amerlanerpaanut iluaqutaanissaanik qulakkeerinnissaaq.
Billettit akikitsut Avalak, aningaasanut inatsit sioqqullugu arlaleriarluta oqaloqatigilluartarsimasarput, qanimut suleqatigalugu ineriartortinneqarput. Iliuuserineqartoq taamaalinerani tapersersorneqarluarpoq taamaammat kingullertigut oqaatigineqartoq paasisinnaanngilarput. Orninnata tusagassiorfinnut nalunaaruteqarnikkut Avalammit oqariartuuteqarnissaq toqqarneqarmat aamma uggoreqaara.
Billettit akeqannginnissaat IA-mit kissaatigineqarsimagaluarmat isertuunneqassanngilaq, kisianni aaqqiissut Finansministeriamit naatsorsorneqarsimavoq, suliniullu Danmarkimi ilinniartuutitsinnut Kalaallit Nunaannut akikinnerusumik billettisisinnaanissaannut tunngassuteqalerluni. Aaqqiissut Air Greenlandip suliniutaanik ILIK Studentimik sanarfeqqiineruvoq.
”Aaqqiissut ilinniartuutitsinnut aningaasaqarnikkut tatisimaneqartunut ikiuutaavoq. Kalaallit Nunaanni angalaneq matussuserneqanngikkaluarluni aaqqiissut angalanerup akisunerpaartaanut aningaasaqarnikkut oqilisaanissamik taamaammat neqeroorutaavoq. Taannaqanngippat tamakkiisumik akiliisoqartariaqassaaq, tamannalu ilinniartuutitsinnut atugassaritissinnaanngilarput,” Aaja Chemnitz oqarpoq.
