Nunatsinni utoqqaat illersuisuat pissutsinik malinnaatitsilluni utoqqaat illuini atukkat pillugit misissuinerminut atatillugu sermiatsiaq-mi allagaa tamanut ammasoq soqutigalugu atuarpara.
Kommune Qeqertalimmi utoqqaat illuini utoqqaat atugaat pillugit suliniutit assigiinngitsut ingerlatatta ilagivaat, utoqqaat sungiusimasaminnik peqqinnartunillu nerisaqarnissaat siunertaralugu Kommuunimi nerisaqarnermut politik-imik suliaqarnerput.
Tassuuna qulakkeerniarparput najugaqartut peqataatillugit nerisatigut pitsaasumik atugaqartitsinissaq pillugu sinaakkutinik sulinermi malikkuminartunik pilersitsinissaq. Naatsorsuutigaarput ukiumi tulliuttumi susassaqartut qisuariaataat tamaasa tigusimalerutsigit inaarutaasumik akuerisassanngorlugu kommunalbestyrelsimut qaqinneqassasoq.
Nunatsinni utoqqaat amerliartornerisa malitsigisaanik suliassat utoqqarnut tunngasut amerliartorput, assigiinngiiaarneruleriartorlutillu.
Utoqqaat aamma inuusunnerusut nappaateqarlutik innarluuteqalersimallutilluuniit inuunerminni atugaqartut, nunatsinni inissianik naleqqutunik amingaateqarnermi utoqqaat illuinut inissinneqartarnerat ilisimavarput.
Kommune Qeqertalimmi ajornartorsiut iliuuseqarfiginiarsimavarput, innarluutilinnut najuaqatigiiffik nutaaq pilersinneqarneranut atatillugu aamma boenhed-itut aaqqissuussanik immikkoortortanik pilersitsinikkut.
Taamaaliorpugullu kommuunitsinni innuttaasut innarluuteqarnertik pissutigalugu kommuunimiit aallartariaqalersimasut, massakkut kommuunimi paaqqutarineqarlutik angerlarsimaffeqarsin-naanerat periarfissaalersillugu.
Nuannerpoq takusinnaallugu najugaqatigiiffiup immikkoortortaani inissiat ikitilersimasut tamannalu takussutissaavoq innuttaaqatitsinnik nuuttoqarsimaneranik.
Takorluukkanut ilaavoq siunissami utoqqarnut sapinnginnerusunut najugaqatigeeriaatsit nunani allani atorneqartartut aamma kommuunitsinni periarfissanut ilanngullugit eqqartornerulernissaat. Massakkut taamatut misiliilluni Qeqertarsuarmi utoqqaat kisimiilersimasut sapinnginnerusullu najugaqatigiiffittut ilusilerlugu utoqqaat illuata qulaani ingerlatsisoqarpoq.
Utoqqaat ikioqatigiillutik pisinnaagallarnerminni taamaaqatiminnik najugaqateqarlutik sapinngisamik inuuneq imaqarluartoq ingerlannissaanut periarfissat taamaattut aamma kommuunitsinni soqutigineqarpata aqqutissiuutissallugit misissugassaqqilluinnarmata.
Taamatut naatsumik suliniutit ingerlasut pillugit saqqummiilaarpunga kommuunimi inuttaqativut juullisiorluarnissaannik kissaallugit.
Niels Kristensen
Inuit Ataqatigiit Aasiaat
