Nunarsuaq tamakkerlugu arnat ulluat
Inuit Ataqatigiinni naligiinnissaq pingaartipparput, suiaassusaappat, inuiaqatigiinni atukkat, Naalagaaffimmi nunarsuarmioqatittalu akornanni nalitut pineqarnissarput aamma pineqartillugu.
Pissutsit ullut makku atukkatta; nunat allat saassunneqartut, FN avaqqullugu suliaqarnerit, nunatta tatineqarnerata, takutippaa, naligiinneq, allanik inissaqartitsineq, nunat killeqarfii, inuiaallu pisinnaatitaaffii nunarsuarmioqatitsinnit navianartorsiortinneqartut.
Taamaammat Inuit Ataqatigiinniit nunatta suleqateqarsinnaanera pingaaruteqartoq, nunattalu iluani innuttaasut ataqatigiittariaqartugut, suleqatigiillutalu ersarissarusupparput.
Issittumi kalaallit siuttuusariaqarpugut, ataqatigiinnermik akaareqatigiinnermillu takutitsinerput nangillugu, suiaaqatigiinnoortut, inuit ikinnerussuteqartut, inuit allamiusut oqaasillit, isikkullit aggerfillillu ataqqillugit, pisinnaatitaaffii ataqqissagigut, illuatungaani aamma nunarput tatineqartillugu illersorneqarnissarput pisariaqartikkatsigu, naleqartitagut ersarissuusariaqarmata.
Arnat ulluanni naqissuserusupparput, arnat nunap inoqqaavisalu pisinnaatitaaffii ukiuni aggersuni ersarissumik illersortariaqarigut, aamma nunat allat suleqatigineranni.
Pisinnaatitaaffimmi namminneq takkunneq ajorput, sulissutigiuartariaqarmata, sualummik ulluni makkunani, ullormiit ullormut pisut sukkasoorujussuarmik allanngorartillugit.
Arnat ulluanni pilluaritsi.
Pipaluk
Naligiissitaaneq pillugu oqaaseqartartoq
