Folketinngimi ilaasortaq, Aaja Chemnitz, Inuit Ataqatigiit
Peqataaffiginngisatsinnik uagut pilluta suliaqartoqassanngilaq, Inuit Ataqatigiit nunanut allanut naalagaaffiullu sillimaniarnermut suliaanut taama politikkeqarput. Taamaattumik Nunarput nunatsinni nunanut allanut tunngasunut aamma naalagaaffiup sillimaniarnermut politikkianut itigartitsisinnaassaaq. Piffissami nalorninartumi, nunatsinnut iluaqutaasussanik aalajangersinnaatitaanitta annertusarneqarnissaa piumasaraarput.
Nunatta inissisimanera tunngavingalugu sillimaniarnermut politikkikkut annertuumik nunarput soqutigineqarpoq. Peqatigisaanik piffissami nalorninartumiippugut, tassami Issittumi sakkutooqarnerit annertusarneqarsinnaapput, tamannalu pissappat uagut aalajangiisuussaagut.
Danmarki aqqutigalugu NATO-mut ilaasortaavugut. Pisariaqartilissagutsigu tamanna pingaaruteqarpoq. Naalagaaffiup nunanut allanut sillimaniarnermullu politikkia nunatta annertunerusumik peqataaffigalugu aqutseqataaffigisariaqarpaa. Naalakkersuisut Danmarkimi illersornissamut siammasissumik isumaqatigiissuteqarnissamut aalajangeeqataanissaanut piumasaqaateqarsimanerat assersuutissaavoq.
Pituffimmi amerikamiut atuinerminnik annertusaarusunnerat ilisimavarput, nunatsinnilu angallannikkut pitsanngorsaanissamut amerikamiut suleqataarusunnermik nalunaarutaannik tigusaqangajalerpugut.
Taamaattumik nunatta aalajangeeqataalluni pisussaaffiisa ersarissarlugillu qulakkeernissaat pingaaruteqarpoq. Nunarput sinnerlugu allat aalajangiissanngillat. Uagut aalajangiisuussaagut, periarfissanullu takkuttunut piumasaqaateqartassalluta.
Silatusaarluta pigutta piumasaqaativut nunatsinni inuussutissarsiornermut inuuniarnermullu iluaqutaassapput.
Danmarkimi illersornissamut tunngasuni inuussutissarsiornerup inerisarneqarnissaa annertuumik oqallisigineqarpoq. Nunatsinni illersornissamut tunngassuteqartunik nunatsinni suliffeqarfiit peqataanissaat pisariaqartipparput. Air Greenlandimut ukiuni 12-ni annaassiniartuusarnissaanut isumaqatigiissuteqarneq assersuutaasinnaavoq. Taama ittunik amerlanerusunik isumaqatigiissusiussaagut.
Nunatsinni illersornissaqarnermut sakkutooqarnermullu tunngasunik suliaqartoqartillugu naaggaarsinnaatitaalernikkut nunatsinni piumasaqaateqarsinnaatitaanerput aqqutissiuussinnaavarput. Piumasaqaataasinnaasut ilagaat suliffeqarfiutitta peqataatinneqarnerunissaat, illersornissaqarfiup Kangerlussuup ingerlanneqarnera akilertassagaat, nunatsinni internetseqarnerup siammarternerunissaa kiisalu nunatsinni nakkutilliineq pingaartumik Kalaallit Nunaata avannaani kangianilu, sakkortusarniarlugu amerikamiunut radar-nik ikkussuititsineq.
