Namminiilivinnissatsinnut sulisariaqarpugut
INUIT ATAQATIGIIT siunertaraat Kalaallit Nunaata aningaasaqarnikkut aamma nunat tamat akornanni inuiaat inatsisaat naapertorlugit namminersulivinnissaa.
Inatsit tunngaviusussaq pillugu missingiut isumaliutissiissullu maanna naammassisimalerpoq, anguniagarlu qallittorlugu alloriaqqittoqarpoq.
Inuit Ataqatigiit pingaartutut isigaarput piumasaralugulu namminiilivinnissatta inatsillu tunngaviusussaq pillugu sulinerup nipangiutiinnarnagu ingerlariaqqittoqassasoq, sulinikkummi ataatsimoorussaqarnitsigullu aatsaat nunarput nammineertoq pitsaanerpaamik angusinnaavarput.
Suleriaqqinnissami Inuit Ataqatigiit isumaqarput aallarniutigalugu makku piaartumik suliarineqartariaqartut:
- Inatsit tunngaviusussaq pillugu missingiutip piaartumik innuttaasunut atuagassiarineqarluni kiisalu isiginnaarutikkut inoqatinullu attaveqaatitigut takuneqarsinnaasumik qaammarsaatigineqassasoq. Apeqqutit pingaarutillit arlaqartut innuttaasunit isummerfigineqartariaqarput. Tunngaviusumik isummerfissat ass. innuttaassuseqarneq, tamat oqartussaaqataanerat pillugu tunngaviusumik isummerfisat aammalu pissaanerup pingasoqiusamik agguagaaneranut tunngasut isummerfissaapput. Apeqqutit taakku innuttaasunit amerlanngitsuinnarnit akineqaratik innuttaasut tamaasa peqataatillugit akineqarnissaat pisariaqarpoq.
- Inatsisartutigut naalakkersuisutigullu suliaq unigani ataqatigiissarluarneqarlunilu ingerlanneqartariaqarpoq, suliassarpummi annertuujuvoq, ataqatigiissakkamik peqqissaartumillu suliarineqartariaqarluni. Inuit Ataqatigiit siunnersuutigaarput suleqatigiifimmik immikkut ittumik inatsisimmik tunngaviusussamik suliaqartussamik Naalakkersuisut Inatsisartullu akornanni ataqatigiissaarisussamik attaveqaataasussamillu pilersitsoqassasoq.
Inatsisartuni partiit, Naalakkersuisut minnerunngitsumillu nunatsinni innuttaasut suleqatiseraavut, alloriarnerup tullianut piffissanngormat. Tamat oqartussaaqataanerat qitiutillugu namminiilivinnisamut sinaakkutit suliarineranni ataatsimoorussamik akisussaaffeqarlutalu suliassaqarpugut, taamaaliussaguttalu innuttaasut peqatigisariqarpagut. Alloriarnerup tulliata ikaarsaarfiginissaanut ilusilersornissanullu peqatiseraassi.
Inuit Ataqatigiit alloriarnermi matumani imaannaanngissinnaasunik suliassaqartugut ilisimaaraarput. Ajornaatsuinnaangitsunik suliaqarnerup qanoq iliorniarnitta ersarissisissinnaagaa upperaarput.
Politikkikkut oqaaseqartartoq
Agathe Fontain
Inuit Ataqatigiit
