TUSAGASSIUUTINUT NALUNAARUT
Naleqqap aallartinneqarnerminnut tunngavitsik qimalluinnarsimavaat.
Tamavitta eqqaammaqqissaarunarparput Naleraq partiitut allartinneqartoq ilaatigut uranimut akerliunertik Kuannersuarnilu aatsitassarsiorusunnginnertik tunngavigeqqissaarlugu.
Naleraq sinnerlugu qinigaatitap Australiamiut tusagassiorfiinit oqaloqatigineqarnermini Narsami eqqaanilu aatsitassarsiortoqartariaqartoq oqaseqarpoq, Aatsitassarsiorniarnermullu akerliusugut ilisimaatsuunitta kinguneranik Narsap eqqaanilu aatsitassarsiornissamut akerliunerarluta.
Ila uagut Inuit Ataqatigiinni qangali ilisimasagut naammattut pigalugit uranitalinnik aatsitassarsiornissamut akerliulluinnartuuvugut, aamma ilisimasagut naammapput Kuannersuarni aatsitassarsiortoqarnissaannut urani kisimi ajornartorsiutaaneraanissamut, Kuannersuarnimi urani kisimi ajornartorsiutaanngilaq.
Naleqqakkut pilersinneqarnerminni tunngavitsik qimalluinnarsimavaat inuiannik, inooriaatitsinnillu illersuisuunerartartut, aatsitassat ajornersaat kulturitsinnik suujunnaarsitsilluinnartussamik tapersersuilersimapput.
Taakku saniatigut Inuit Ataqatigiinni isumaqarpugut aatsitassarsiorfiit isumalluutigalugit namminersulerniarneq sianiilliornerussasoq uteriarfissaqanngitsoq, nunatta namminersulernissaannut isumalluutaasut ataasiinnaapput tassaappullu Kalallit Inuiaat, inooriaasillit pinngortitamut ataqqinnillutik.
Siunissami politikkertik qanoq ingerlatissaneraat pissanngatigalugu malinnaaffigaagut, Inuit Ataqatigiinni tunngavigisagut attattuarpagut angutserlugillu suliagut ingerlappagut, anorip aningaasalluunniit qanoq innera apeqqutaatinnagu, inuiaalli kalaallit illersortuarlugit politikkerput ingerlapparput.
Mariane Paviasen Jensen
