Siumut quppernerani atuagara tupigusuallaatigaara; tassa Kommune Qeqertalimmi Siumut avammut nalunaaruteqarpoq Aasianni ineqarneq pillugu nutaamik mamianartuliortoqarneraalluni. Oqariartuutigineqarpoq suliaq ataatsimiisitaliani kommunalbestyrelsimiluunniit isummerfigineqarsimangittoq. Tamatut allanneq eqqunngittumik siaruarterineruvoq; tassami allaaserisaat tamarmik ataatsimiisitaliani kommunalbestyrelsimilu akuerineqarnikuupput aamma aallaserinnittunit akuerseqataaffigineqarluni.
Eqqumeeqqinnaamik Ineqarnermut Attaveqatigiinnermullu Naalakkersoqarfimmut allakkanik takunnikkumasoqarsimavoq kommunimullu angussinatik, tassuuna paasisaqarsimanerarput utoqqarnut inissiat siunertamut allamut atorneqalissasut kommunip siunniussimaga. Oqaluttuarinngittorpaalli siunertamut allamut atorneqarsinnaalernissaannut namminneq akuerseqataanikuugamik. Tassami siorna ataatsimiisitaliani Inuit-ni ulloq 10. august 2023 aamma Inua-mi 23. august najugaqatigiiffik Qinngornermut ileqqoreqqusaq nutaaq akueraat; tassa Siumut akuerseqataavoq, kiisalu 31. august 2023 kommunalbestyrelse-mit tamarmiusumit akuerineqarput tassani aamma Siumup ilaasortaatitai akuerseqataapput.
Kommunalbestyrelsemi iliuuserisagut tassaapput Kommuunitsinni inissianik sanaartortitsineq, siunertaq tamanna inissiaatileqatigiiffimmik pilersitsinikkut sanaartornerit aallartissasut tamannalu kommunalbestyrelsep tamarmiusup akuerseqataaffigivaa.
Sanaartornerup ingerlanneqarnerani akit allanngorartuupput, sanartortitsinerlu naammassigaagat aatsaat inissiat akissai aaliangiiffigineqartarput tamannalu suli pinngilaq. Oqaatigineqarsinnaasorli aajuna sanartukkat kommunalbestyrelsip akuerisimasaasa iluani ingerlanneqarmata.
Taamaakkaluartoq Siumumit tamanna akerlerineqarsimasoq maanna paasinarsivoq. Aalajangiussat akerleringaanni ataatsimiinnermi aalajangiiffiusumi qisuarinarnissaq perisarfissaavoq taamaasiortoqarsimanngilarli. Tamanna uggornarpoq; tassami pifissaatillugu iliuuseqarsimanngillat.
Kaammattuutigaarput ineqarneq pillugu kommuninut tamanut nunatsinnullu iluaqutaasussamik ineqarneq pillugu aaqqissuusseqqittoqassasoq. Ajornartorsiut tamanna qinikkatut akisussaassuseqarluta pitsaanerusumik ingerlavissamik nassaartariaqarpugut. Aaqqiiniarnermi Kommunalbestyrelse-t aamma Naalakkersuisut suleqatigiilluinnartariaqarput.
Isornartunik tikkuaaneq ajunngilaq qinikkatulli isornartorsiuissagaanni aaqqiissutissamik tikkuussinissaq minnerunngitsumik piffissaatillugu qisuariartarnissaq pisussaaffiusutut isigaara, tamannalu aallaavingalugu Inuit Ataqatigiit kommunalbestyrelsemi sulissapput.
Inuit Ataqatigiit gruppianni siulittaasoq
Marianne S. Larsen
Kommune Qeqertalik
