Kommuneqarfik Sermersuumi suleqatigiit nutaat
Kommuneqarfik Sermersuumi politikkikkut suleqatigiit nutaat pilersinneqarput. Demokraatit aamma Inuit Ataqatigiit suleqatigiinnissamik isumaqatigiissuteqarput. Isumaqatigiissummi, 2023-miit 2025-mut atuuttumi, inuiaqatigiinni aningaasaqarnikkut attanneqarsinnaasumik pilersitsinissaq aamma siunissami ajornakusoornerusinnaasunut periarfissanullu kommunip sillimmaartaarnissaa pingaartinneqarpoq.
Isumaqatigiissummi immikkoortut pingaarnerit:
- Attanneqarsinnaasumik aningaasaqarneq ineriartortitsinerlu
- Tamanut atugarissaarnerulerneq suliffissaqartitsinerlu
- Inuuniarnikkut akisussaassuseqarneq ingerlalluarnerlu
- Innuttaasut utoqqaanerusut uummaarinnerusumik peqataallutillu inuuneqarnissaat
- Illoqarfimmik inoqarfinnillu ineriartortitsineq
- Attaveqaasersuutit ingerlalluartut ataatsimoortullu
- Sila avatangiiserlu pillugit ataatsimut ineriartortitamik politikki
- Aalisarneq piniarnerlu
- Meeqqat atuarfiat ulluuneranilu paaqqinnittarfiit
- Kulturimik attassineq ineriartortitsinerlu
- Timersornermut politikki periarfissanullu periusissiaq
- Toqqissisimaneq, pitsaaliuineq aamma angajoqqaanik peqataatitsineq
Demokraatit aamma Inuit Ataqatigiit Kommuneqarfik Sermersuup piunerata annersaani suleqatigiissimapput, partiillu taakku marluullutik suleqatigiileqqinnissartik qilanaarivaat:
Demokratit gruppiani siulittaasoq, Justus Hansen:
“Inuit Ataqatigiinnik suleqateqarnitta aallarteqqinnissaa assorsuaq nuannaarutigivarput. Naak ukioq kingulleq suleqatigiissimanngikkaluarluta siusinnerusukkut kommunalbestyrelsimi qanimut suleqatigiinnitta takutippaa ataatsimoorluta angusaqarluarsinnaanerput. Taamatut suleqatigiinnitta nanginneqarnissaa qilanaarivarput innuttaasullu siunissaat pitsaanerusoq pilersillugu.”
Inuit Ataqatigiit gruppianni siulittaasoq, Juuaka Lybert:
“Una isumaqatigiissut siumut tikkuussivoq. Isumaqatigiissutigivarput kommunip sumut siunertaqarluni ineriartortinneqarnissaa. Qularutiginngivippara suleqatigiinneq nutartigaq inerisitaqarluassasoq.”
Borgmesteri, Avaaraq Olsen, Inuit Ataqatigiit:
“Una nutaamik suleqatigiilerneq assut nuannaarutigivara. Kommunalbestyrelsimi siusinnerusukkut suleqatigiissimanerput patajaatsumik tunngavissiilluarpoq, naallu ukioq ataaseq suleqatigiissimanngikkaluarluta qularutiginngilara suleqatigiilluarnerput ingerlateqqissinnaallutigu. Suleqatigiilerneq una nutartigaq qilanaarivara, innuttaasutsinnullu pitsanngorsaatissanik pilersitsiffigalugu.”
