Kommunalbestyrelsemi akisussaassuseqartumik ingerlatsivugut
Kommunalbestyrelse ataatsimoortoq aningaasaqarnikkut missingersuutinik akuersivoq. Tamanna tamatsinnut pitsaasuuvoq. Innuttaasut pillugit ataatsimoorussaqarsinnaassuseq piusoq takutikkatsigu.
Piffissami kingullermi Inuit Ataqatigiit borgmesteriutitaqarnerat peqqutigalugu annertuumik isornartorsiorneqartarpugut, ass. isumaginninnermut tunngasunik kommuunip ikioqqulluni saaffiginnissuteqarsimanera aammalu aningaasatigut aqutsinermi tikkuaasoqartarsimalluni.
Isornartorsiutit tiguagut, akisussaassuseqartumillu iliuuseqarfigaavut, taamaaliorpugut innuttaasut pillugit, partiitut qalipaatigut kisiisa aallaaviginagit.
Isumaginninnikkut ingerlatsineq pitsanngortinneqassappat kommunalbestyerelse angisuumik akisussaaffeqarpoq. Akisussaaffigut inatsisinik tunngavillit kivissinananngikkutsigit akisussaaffeqarpugut iliuuseqassalluta, taamaammat borgmesteritta akisussaaffimmik tigusilluni iliuuseqarnera tamakkiisumik Inuit Ataqatigiit tunuliaqutserparput.
Ingerlatsinikkut aqutsinermi isiginiagassat arlaqarput. Ukiorpanni kommuuni kujallermi ingerlatsinermi aaqqitassaqartoq ilisimaneqarpoq, maannalu kommunalbestyelse tamarmiusoq aaqqiiniarluni sulissuteqassalluni siunnerfeqarnera akisussaassusilimmik alloriarneruvoq. Maanna siunissaq isigalugu pitsaanerulersitsinissarput suliarissavarput. Siunissami ineriartorneq pissappat aaqqissugassat imaanaanngitsut, aamma aningaasaqarnikkut, aqqusaaqqaartariaqarpagut. Ajoraluartumimmi paasinarsivoq qinigaaffiup siulianili akileraarutinut kinguartoorneq pisarsimasoq, soorlulusooq akiligassanut allanut aamma kinguartoortoqartarsimasoq, kommunalbestyrelselsemi ilaasortanit ilisimaneqanngitsumik. Soorlu aamma paasineqartoq Naalakkersuisoqarfiup kommuunip aningaasaqarnerata ernumanarluinnartumiinnera 2020-imili saaffiginnissutigisimagaa, tamannalu aningaasaqarnermi ataatimiititalialluunniit ilisimasimanngikkaa.
2021-mi ukiumut naatsorsuutit matuneqarmata kommuuni 153 mio kroninik, aammalu 2020-imi 122 mio kronenik akiligassaqareerpoq.
Inuit Ataqatigiinni isornartorsiuinerit inissaqartippagut, uatsinnulli pingaarnerpaaq tassaavoq iliuuseqarneq. Uagut innuttaasut pillugit tatituumik suleqatiginnissinnaaneq nukinngortillugu sulineq ingerlatissavarput. Innuttaasut tamanna pisariaqartippaat.
Ukiumut qaangiutilersumut tamassi ajunnginnerpaamik kissaallusi, juullisiorluarnissassinnik ukiumullu nutaamut iserluarnissassinnik kissaappassi.
Inuit Ataqatigiit
Kommune kujallermi gruppiani siulittaasoq
Pipaluk Jakobsen Larsen
