KNI Pilersuisoq aningaasatigut ajornartorsiornermini patsisiliuppaa pisisartugisamik ikilisimanerat, inuiaqatigiit amerlasuut illoqarfinnut anginerusunut nutsernerat, angallasinerullu Kangerlussuarmiit Nuummut nuuneqarsimanera, assigiinngisitaartunillu tunngavilersorlutik.
Ulluinnarni niuertarfinni atuisuusugut malugisarput niuertarfinni qinigassat annikilligaluttuinnarnerisa ilutigisaanik nioqqutissat akitsoraluttuinnartut, ukiunimi kingullerni nioqqutissat akitsoriartornerannik eqqornerlunneqarnitta saniatigut niuertarfinni pisiarisinnaasagut ikiligaluttuinnarput, KNI-p niuertarfiutaanni nioqqutissat amigaateqartuaannartuupput, pisiniallu pisiariumasaanik amigaateqartuarlutik.
Kikkunuku niuerutissanik aalajangiisartuusussat?
Qinigassat ikilisinneqarujussuarnikuupput soorlulusooq ullutsinni 2025-mi niuertarfiit tassaalersimasut pisisartut sunik pisinissaanik aqutsilersimasut, niuernerli taamaattuunngilaq, pisisartut tassaapput aamma tassaajuassapput pisiariniakkamik suunerinik aalajangiisartussat, imaanngitsoq niuertarfiit aalajangersuisussat.
KNI-p Pilersuisuip sinerissami ingerlatsinerlunnermik alligaluttuinnartumik aqqusaagaqarnera akuersaaginnarneqarsinnaanngilaq, pilersuisussaatitaanermik nunatta karsianiit tapiissutinik pissarsisarneq atuuppoq taamaammallu tamanna aamma naammassineqartariaqarpoq, KNI- pilersuisup aqutsisui tassaanerarneqartuarput nioqqutissanik sorlernik isorliunerusuni nioqquteqartussaanerinik aalajangiisartut, taamaammat nioqqutissat qinigassat pisisartut piumasaannik niuertut ulluinnarni nioqquteqarusukkaluit killilersimaarneqarlutik oqariartuuteqartarneri tusarsaajuarpoq.
Nunatsinni nioqqutissiat suna pissutigalugu nioqqutigineqanngillat?
Killilersuinerup annerpaanngorsimanerata ersarinneranut takussutissat ilagaat kalaallit namminersortut naatsitatigut nioqqutissiaannik pilersuisumi pisiassaqannginnera, Kalallit Niuerfiat tassaalersimavoq nioqqutissanik akikinnerpaanik nunanit allanit pisiniariarluni, nunaqavissunut akisunaaraluni nioqquteqarluni, kalaallilli nioqqutissiaanik ass. naatsiaanik, ruaanik allanillu nioqquteqarumanngitsoq.
KNI Pilersuisup qullersaqarfianiit aqutsineq annertuallaalersimavoq tamannali unitsilli:
Taamaalilluni Isorliunerusuni najugaqarnermi ilungersunareersumi suli annermik ilungersunarninngortitsisuusoq, ulluinnarnimi pisariaqartilluinnarneqartut amigaataajuarnerata ullutsinni oqinnerulaamik inuusinnaaneq inuit ujartugaraat, KNI pilersuisup akitigut unammillernartorujussuarnik nioqquteqarniartarnerminni ilungersortitsisuuvoq, taamaalilluni isorliunerusuni inuuniarnermut oqimaanerunissaannik KNI pilersuisoq annertuumik akisussaaqataasutut pissusilersorpoq, tamanna akuerineqarsinnaanngilaq, aqutsisuisa minnerunngitsumillu siulersuisuisa eqqummaarinnerunissaat pisariaqavippoq niuernerluppallaaqaat.
Aaqqiisutaasinnaasut allat:
Nioqqutissat akisunaarneqartarneri unittariaqarpoq aamma pisiniartartunut pisiassanik amerlanerusunik qinigassaqalersinneqartariaqarput, niuertut piffimminni ilisimaarinnittuusut tusaaneqarnerusariaqarput, kiisalu KNI-p pisortai sinerissamut atuisunik qanimut oqaloqateqartariaqartut aaqqiissutissamillu pitsaanerusunik niuernerup pitsaanerusumik ingerlalernissaannut taamaalillutik nassaarsinnaasariaqarput, ungataaniit aqutsineq qimallugu atuisut, niuertullu kissaataat malinneqarnerusariaqarput.
Qinikkattut suliassagut suliarissavagut, piginnittuunermut politikki allanngortitittariaqarnersoq misissorneqassaaq, aaqqiissutaasinnaasut ujartorneqassapput, ilaatigut kalaallit nioqqutissaataat akikinnerussasut anguniarparput, taakkuninngalu nioqquteqarsinnaaneq aqqutissiuuneqartariaqarpoq.
Ataatsimiititalianilu susassaqartuni KNI-p aqutsisui naappikkusullugit sulissutigineqassasoq partiitinni isumaqatigiissutigaarput.
Mariane Paviasen Jensen
