Inuusuttunut tulluuttunik inissialiortitsinissaq Naalakkersuisunit pingaartinneqanngilaq
Inuusuttut Nunarput tamakkerlugu inissaaleqipput. Inissiat inuusuttunut tulluartut, akilersinnaasaat, kolligiaappata inissiaappataluunniit amerlasuut assigiinngitsullu pisariaqartippagut. Inuusuttut isumalluartikkusukkaluarpagut inuiaqatigiittut akisussaassuseqaqatigiinneq aallaavigalugu inissianik assigiinngitsunik inissaannik pilersitsissalluta pilersaaruteqarnikkut.
Inuusuttut inissiaat pillugit nassuiaammik Naalakkersuisut kingusinnerpaamik 2019-imi Ukiakkut ataatsimiinnermi saqqummiussinissaat pillugu Inatsisartuni aalajangiiffigisassatut siunnersuut Naalakkersuisooqatigiit tapertaasalu ippassaq itigartippaat.
Naalakkersuisut qupperneq affaanngingajattumi itigartitsinerminni allapput Kalaallit Nunaanni sanaartukkanik innuttaasut pisariaqartitaannut naleqqussakkanik takorluugaqareerlutik. Taakkununnga assersuutigivaat ”inissiat tamanit atorneqarsinnaasut”, Qaqortumi Sisimiunilu sanaartorneqartut aammalu illoqarfinni allani sanaartorneqartussaasut taaneqarsinnaapput.
Inersuarmi oqallinnerulluunniit nalaani uppernarsisinnaasimanngilarput inuusuttunut inissiat suut, qanoq amerlatigisut, qanorlu akillit sanaartorneqarnissaannut takorluukkersaarutigineqarsimanersut.
Inuit Ataqatigiit akuersaarsinnaanngilarput inatsisartuusugut taama Naalakkersuisunit pitsaanngitsigisumik sullinneqarneq. Sulerusuppugut paasissutissanik pitsaasunik peqarluta.
Inuusuttagut inissaqalersinnaanissaanik isumalluarsarusuppagut, tamanna inuusuttatta inuiaasugullu pisariaqartipparput.
