Inuit Ataqatigiit isumaqatiginninniarnermi siuttuunitsinni pingaartissimavarput allannguinissamik oqariartuutitta innuttaasunit tigulluarneqarsimanera. Inuit Kommune Kujallermi siuttut taarserusunneqartut qinersiviup unnukkuani ersarissivoq. Tamannalu ataqqillugu maniguulluta suliarissavarput.
Taamaattumik ilaatigut piumasaqaatitalinnik aammalu allannguerusunnermik anersaaqarluta partiinik oqaloqatiginninnerit ingerlassimavagut. Oqaloqatigiinnerit torersumik ingerlapput.
Piffisarli kingulleq paasinarsivoq qanilliartornata ungasilliartortugut. Neqeroorutivut; ataatimiititaliat marluk, ataatimiititalianilu ilaasortaaffiit tamakkiisut, tassalu ataatimiititaliani tamani marlunnik ilaasortaatitaqarneq kiisalu 2. viceborgmesteri qujarunneqanngillat. Tamanna patsiseqarunarluni piumasaqaataanngitsumik, kisiannili kissaatitaqarmat ataatsimiititaliami siulittaassuuffiup aappa, tassalu atuarfeqarnermik siulittaassuuffik suliassamut tulluarsorisatsinnik inuttalerneqassappat qujarutissallugu.
Taamaakkaluartoq ajoraluartumik neqeroorutivut naammagineqanngimmata, Siumumik oqaloqatigiinneq tassunga killittariaqarsimavarput.
Atassut ukiuni sisamani suleqatigissallugu isumaqatigiissuteqarfigaarput. Ataatsimiititaliamik ataatsimik siulittaasuuffissalerlugu, kiisalu ataatsimiititaliami allami inissamik aamma tunillugu.
Qularinngilara Atassut suleqatigilluassallugu aamma nalunngilara Siumut ataatsimiititaliani suleqatigilluartassallugu.
Suleqatigeerusunnerugaluaq iluatsinngimmat uggoraara, kisianni allannguerusulluta qineqqusaarsimanerput piviusunngortikkusukkatsigu tassunga killittariaqarsimavugut.
Arfininngorpat 1. maj kommunalbestyrelse nutaaq ikkutsinneqassaaq, inissitsiternerillu tassani pissapput.
Qaqortoq 29. april 2021
Stine Egede, Inuit Ataqatigiit
