Aaja Chemnitz, Inuit Ataqatigiit
Partiit arlaliusut NATO-p nunatsinniittariaqanerannik oqaaseqarsimapput. Tamanna Inuit Ataqatigiinniit isumaqatiginngilarput. Ukrainemi sorsuttoqartillugu nunarsuatsinnilu isummatigut akerleriittut amerliartortillugit NATO-p nunatsinniilernissaanik isumaqarneq ulorianartuuvoq. Sapinngisarput tamakkerlugu nunatta eqqissisimaffiunissaa siunertaassaaq.
NATO siooranartorsiortoqavitsillugu atuutilersarpoq, nunatsinnilu taamaattoqanngilluinnarpoq. Akerlianik NATO-p sakkutuuinik nunatsinniinnissaanillu noqqaagutta pisoq annertuseriartissinnaavarput. Kalaallit Nunaat Atlantikorlu avannarleq immikkoortittariaqarpagut. NATO-mut naaggaarnitsinnut taarsiullugu imaatigut, nunakkut silaannakkullu illersornissatsigut eqqissisimasumik ineriartortitsinissarput angissavarput, aammali cyber kiisalu silaannarsumi(space) sillimaniarneq eqqaamallugit.
Inuit Ataqatigiit isumarput naapertorlugu Kalaallit Nunaata nunanut allanut, sillimaniarnermut illersornissatigullu namminerisamik politikkeqarnissaa utaqqeqqissinnaanngilarput. Tamatumalu saniatigut silaannakkut angallannerit annertunerusumik paasisimasaqarfiginissaat pisariaqartipparput, cyberikkullu isumannaatsuunissatigut nukittorsaanissaq eqqarsaatigalugu tigussaanerusunik piumasaqarnerusariaqalerluta. Nunatut sillimaniarnermut ineriartornermut ilaannginnerput nalorninaallisartariaarpoq, taamaammat inunnut paasissutissanut inatsit allanngortissavarput, suliffeqarfinni pisortanilu pikkorissartitsissaagut kiisalu IT-tigut isumannaatsuunikkut naliliisitsissalluta.
Nunanut allanut tunngasutigut nunatsinnilu isumannaallisaanikkut nunatsinnullu pissutsinut aalajangiussanut naaggaarsinnaatitaassaaq. Tamanna uagut peqataatinnata iliuuseqartoqartannginnissaanik siunnerfitsinnut naapertuuppoq. Sakkutooqarnikkut annertusaanissaq aqqutissaanngilaq.
