Inuit Ataqatigiit ileqquusumik ataatsimeersuarneri ukiut pingasukkaartumik pisarput, ileqquusumik ataatsimeersuarnissaq ilaatigut covid-19 peqqutigalugu ukioq kingulleq pisinnaasimanngitsoq aasaq manna aggustip arfernaniit arfineq pingajuat ilanngullugu Qaqortumi pisussanngorpoq.
Immikkoortortaqarfiit qinikkallu peqatigiillutik ukiuni tulliuttuni pingasuni naalakkersuinikkut anguniakkanik aalajangersaallutillu partiip siulersuisuunerinik qinersissapput.
Ataatsimeersuarneq Qaqortumi immikkoortortaqarfipput suleqatigalugu ingerlanneqassaaq. Ataatsimeersuarnermi najuussinnaatitaapput soqutiginnittut, alaatsinaattut qaaqqusallu. Ataatsimeersuarnermi pilersaarut malittarisassavut malillugit ataatsimeersuarnissaq sap. ak. pingasut sioqqullugu saqqummiunneqarumaarpoq.
Ataatsimmeersuarnissaq pillugu Inuit Ataqatigiit siulittaasut Múte B. Egede ima oqaaseqarpoq: “Qaqortumi ileqquusumik ataatsimeersuarnissatsinnut immikkoortortaqarfitta oqaluuserisassanngortitassaanut qilanaarpunga, katerinnitsinnilu naalakkersuinikkut ukiuni tulliuttuni siunnerfinnik aalajangersaanissamut neriuuteqarluarlunga.”
Inuit Ataqatigiit Siulersuisuuneri sinnerlugit
Múte Bourup Egede
Inuit Ataqatigiit siulittaasuat.
