Ilisimasat atorlugit naqisimannittoqartarpoq, nunasiaatillit taama ingerlariuseqartuarsimapput.
Nunarput pineqartillugu uagut matup silataani soriarsinnaajunnaartinneqartarpugut. Danskit naalagaaffiata ataaniinnerput apeqqusertariaqarparput, suut tamaasa nunatsinnut attuumassutillit apeqqusersorlugit nalilersortigit.
Tamanna naalakkersuisoqatigiinnissamut isumaqatigiissutaavoq, allassimammat pissutsit taamaaginnarnerat periarfissaanngitsoq. Ministeriunerup oqaatigiuarpaa, Kalaallit siunissaat Kalaallit Nunaannit aaliangerneqassasoq, sooq taava ilisimasatik kalaallit Inatsisartuinut isertuutissavaat?
Piffimmi matumani nunarput naalakkersuttalu nukittuumik inissinnissaat pingaarnerpaavoq. Maanna naalagaaffiup ataani inissisimanerput, danskit ilusilersugaat, attaneqarsinnaanngitsoq naalakkersuisoqatigiit isumaqatigiissutigaat, taamaammat inissamiippoq apeqqusissallugu danskit ilisimasassatigut pissaaneq tigummiinnarniarpaat?
Isumaqatigiinninniarnerit inatsit tungaviusumit aallaavillit aallartittariaqarpagut, nunarput nukittuningussappat tamanna avaqqussinnaanngilaq. Oqartussaaneq aalajangiisinnanerlu uatsinniilissappat allamik anillariarfissaqanngilagut.
Apeqqut tamanna inuiannit maani isummersorfiginiartigu.
Pipaluk Lynge
Inuit Ataqatigiit
