TUSAGASSIUUTINUT NALUNAARUT
Ilisimaatsutut tikkuarneqarnerput akuersaanngilluinnarparput.
Suliffeqarfeeqqap Australiami angerlarsimaffillip Kuannersuarni aatsitassarsiorniarluni sunniinniarluni tusagassiarineqarnerani, qinersilernerullu nalaani nunatsinnukarniarlutik paasititsiniaanissamik suaaruteqarnerat tupinnaqaaq.
Oqaatigilara ilisimasat naammattut tunngavissaqartullu atorlugit Kuannersuarnut tunngasumik Inuit Ataqatigiinniit aalijangiusimavarput Kuannersuarni aatsitassarsiortoqassanngitsoq, oqarfigineqassanngilagut paasisimasakissuseq aallaavigalugu isummersimasugut tamanna Kalaallinut isiginnittaatsip qanoq appasitsigineranik saqqummiussinerusoq isumaqarpugut.
Ilisimasagut naammattut pigalugit Kuannersuit sunik aatsitassaqarnera ilisimaaralugu suliniullu qanoq suliariniarneqarnersoq aallaavigalugu Kuannersuit aatsitassarsiorfigineqassanngitsoq aalijangiusimavarput.
Ilisimavarput aatsitassat assigiinngisitaassutsimikkut immikkuullarisuumik peqarfiusoq, ilisimavarput annikinngitsumik qinngornernik ulorianartunik peqarfiusoq, ilisimavarput aatsitassanik allanik ulorinaatilinnik peqarfiusoq, ilisimavarput aatsitassarsiorniat akuutissanik arrortikkuminaatsunik atuillutik aatsitassanik piiaaniarlutik pilersaaruteqartut, ilisimavarput nunani allani qinngornernik ulorianartulinnik aatsitassarsiorfiit qanoq ittuuneri, ilisimavarput uagut Kalaallit tassaasugut pinngortitamik inooqateqarluinnarluta inooriaaseqarnerput, pinngortitarlu salinneqarsinnaanngitsumik pilersitsivigineqarpat inuussutitta pingaarnersaat tassaasut silaannaq minguitsoq, imeq minguitsoq, imartarput minguitsoq, nuna minguitsoq tassaasut inuussutitta pingaarnersaat taakkulu aserorneqajallappata nunami inuusinnaanerput killilerneqassasoq. Ilisimavarput qanorluunniit aningaasaateqartigileraluarutta pinngortitaq paarilluanngikkutsigu inuusinnaanerput ajornarsiumaartoq.
Kalaallit oqaluffigineqaannarsinnaanngillat eqqarsarsinnaasusaat paasinnittaasaat annikinnerarlugit paasisimasaqaratik aalijangiisarnerarlugit, Kalaallit namminneerlutik eqqarsarsinnaasuseqarput aalijangersinnaasuseqarput. Nunani allamiut aningaasarsiorfissatut isigisaat uagut inuuffissatut isigaarput, ilisimavarput aamma aatsitassarsiorfiit tassaasinnaanngitsut namminersulivinnissamut aalijangiisuusussat, namminersulivinneq aatsitassarsiorfinnik isumalluuteqarluni ingerlanneqarsinnaanngitsoq taamaalioraannimi assigiinnarpaa aatsitassarsiorfinnik aqunneqarneq, aatsitassarsiorfinnik aqunneqarata namminneerluta napatissinnaaneq angujartuaarlugu ingerlatsinissarput pisariaqarpoq.
Inuit Ataqatigiinni qulanngivilluta ilisimasagullu aallaavigalugit aalijangiisimavugut, inuiaqatigiit amerlanerussuteqartut aalijangiiniarnermi tassani qinersinermi 2021-imi taasinerat ataqqineqartariaqarpoq. Aatitassarsiofiit aningaasarpassuarnik taarsiivigeqqullutik eqqartuusivilersuusiniaatigalutik nunatsinnukarlutik nuannareqqusaariartorniarnerat Kalaallit eqqarsartaasaannik mittatiginninnerusutut oqaatigisariaqarpoq.
Kalaallit nunaat nunarsuarmi minguinnersat ilaattut isigineqarnera tassaavoq pigisarput nalitooq taannalu aningaasanik isilinniit aserorniarneqartoq akuerineqarsinnaanngilaq, allaat kalaalllit ilisimaatsuusutut oqaatiginiarneqarlutik. Uranimut Naamik Qujaannarpunga, nunarsuup aseruutigisinnaasaannik pilersitseqataanianngilanga.
Mariane Paviasen Jensen
Inuit Ataqatigiit sinnerlugit Inatsisartuni ilaasortaq.
