Danskit aningaasaliiniarnerinut piumasaqaateqarpugut
Naalakkersuisut aamma danskit naalakkersuisui atugarissaarnerunissaq aningaasaqarnikkullu ineriartortitsinissaq pillugit isumaqatigiissuteqarput.
Inuit Ataqatigiit tunngaviusumik isumaqarput nuna kinaluunniit nunanik allanik aningaasaqarnikkut isumalluuteqarpallaaruni nammineq aqussinnaasaat annikillisartut. Matuamini inuuniarnikkut aningaasaqarnitsigullu assorunnerput danskit aningaasaliiniarnerannut akuersinitsinnut tunngaviuvoq, danskittaaq pisussaaffeqarnerat aamma ilisimaarigatsigu.
Danskit peqqinnissaqarfimmut aningaasaliiniarnerat pissusissamisoorpoq. Aningaasaliinerilli allat eqqarsaatigalugit piumasaqaatigut ukua saqqummiutsinnagit oqaatigerusupparput, danskit tungaanniit annertuumik aningaasaliinerit nunamut oqartussaassuseq annertunerulersinniarlugu illersornissamullu periarfissat annertulerulersitsiniarlugit suliaasutut isigigatsigit.
Piumasaqaatigut ukuupput:
- Ittoqqortoormiini mittarfittaarnissaq akueraarput, pisariqarpormi, tamannali malitseqassaaq innuttaasut danskit nunami oqartussaasseqarnertik takutinniarlugu innuttaqalersissimasaanni innuttaasut najugaqartut nunatta sinnerani angalasarnerisa akikillisaavigineqarnissaannik. Ittoqqortoormiini innuttaasut nunami asasaminni nunatsinnut ilaanertik malugilluarsinnaasariaqarpaat. Tamatumanittaaq ilaassapput inooqatigiinnikkut pisariaqartitaasut pitsanngorsarniarlugit iliuusissat allat. ass. nakorsaqarneq nioqqutissanillu pilersorneqarneq.
- Ittoqqortoormiit ineriartortinneqassaaq, nunatsinnullu aningaasaliinernulli allanut siunissamut ungasinnerusumut danskit inuussutissarsiornermut siuariartuutaasinnaasunut aningaasaliissapput. Danskit nunatsinni erngup nukissiorfiliornissanut aningaasaleeqataassasut piumasaraarput.
- Kujataani Qaqortumi itisuumik talittarfiliornissap sanaartornissaat Danmarkimit akilerneqasoq paasivarput. Sikorsuit ajornartorsiutaasarmata periarfissat assigiinngitsut suunersut qulakkeerneqassasut piumasaraarput. Talittarfik Illersornissaqarfinnut atorneqartussaq nunatta ineriartornerannut iluaqutaallunilu atorneqarsinnaasariaqariaqarpoq. Taassuma saniatigut Innuttaasut angallannerannut iluaqutaasussanik danskit aningaasaliinerat pisariaqarpoq. ass. Itilliarsuup ikerasaliorfigeqarnera allatigulluunniit angallannikkut oqilisaasussanik aningaasaliineq. Illersornissamut annertusaaniaraanni aamma nunami ineriartornermut aningaasaleeqataasoqartariaqarpoq.
Ilaatigut tamakku Inuit Ataqatigiit aningaasanut inatsimmi isumaqatigiinniarnitsinni qaqikkumaarpagut.
Iddimanngiiu Jensen Bianco, Inuit Ataqatigiit.
