Inuit Ataqatigiit partiit aningaasanut inatsisissamut isumaqatigiissuteqarnissamut suleqataasimanerat nuannaarutigaat.
Aningaasaqarnerput patajaallisarniarlugu akisussaassuseqartumik aningaasaqarnikkut ingerlatsisariaqarpugut, aatsaat taamaliorutta anigaasalerumasagut qallittorsinnaavagut. Tamannalu pisussaaffittut isigaarput.
Anigaasat isumaqatiginninniarnermi aningaasat isumaqatigiissutit amerlanngikkaluartut ukiunut tullernut siunnerfileeqataallutalu piumasaqaateqarpugut.
Piumasaqaatigut arlaqarput pingaarnertulli piumasaqaatigivarput utoqqarnut tulluartunik inissiaqalernissaq siunertaralugu Naalakkersuisut kommunit suleqatigalugit pilersaarusiornermut aamma pingaarnersiuinermut suliassanut kivitsisoqassasoq. Utoqqarnullu tunngatillugu ilanngullugu piumasaraarput utoqqartatta soraarnerusutisiaqalernerminni suli sulisinnaasutut misigisimagunik sulinissaminnut aporfigisartagaat peerneqassasoq, soorlu tamanna aamma inatsisartuni siunnersuutitsinnut ilaasoq.
Taamatuttaaq nunatsinni meerartaarnerup kajunginnarnerulernissaa anguniarlugu erninermut sulinngiffeqartarnermut inatsisit tamakkiisumik ernisartut atugarisaat tunngavingalugit nutarsarneqarnissaanik suliaqarnissaq siunniunneqarpoq. Tamanna uatsinnut pingaaruteqarpoq, nunarpummi inukilliartormat.
Takornariaqarnikkuttaaq isertitsinerunissarput piumasarivarput, takornariaqarnikkut akitsuutit qaffanneqarnissaata pinissaa pisussanngorpoq matumani unnuisarnermut akitsuut ukiup tulliani ukiup affaa kingullermi qaffanneqarnissaa angugatsigu. Takornariaqarneq inuussutissarsiutitut ineriartortillugu inatsisiliorsimavugut inatsisillu atuutsinneqarnerata nakkutigineqarnissaa piumasaralugutigu. Takornariaqarneq nakkutigisaasumik nunatsinni ingerlassaaq aamma innuttaasunut toqqissisimanassaaq, taamaammallu nakkutiginnittoqarnissaanut suliniummut aallartitsinissamut aningaasaliineq anguarput.
Nunasiaataanerup kinguneranit timikkut tarnikkullu kingunerlutitsineq inuiaqatigiittut atugaraarput. Inuppassuit killissaminnik qaangiiffigitissimapput, kingunerluutillu kinguaariinni suli malugineqarput, taamaammat Naalakkersuisuvut piumaffigaagut dankit naalakkersuisuinut inuiaqatigiittut mamisarnissatsinnut akisussaaffimmik kivitsisoqarnissaanik piumasaqaqqullugit.
Immut pilersornissamut aningaasaliinissaq aamma anguarput, maanna immunut pilersornermut periusissiap aningaasartalerneqarsinnaalissaaq. Sutigut tamatigut imminut pilersornikkut avataanit pisiassanik atuivallaarnerput annikillisarsinnaavarput.
Tasiilami mittarfittaarnissamut naalakkersuisoqatigiit isumaqatigiissuteqarnerat tunngavingalugu pilersaarusiornissap aallartinnissaa aamma kissaatitta ilagaat, pisariaqarpormi tunumi inuussutissarsiutitigut aamma ineriartortitsinissaq.
Danskit nunatsinnut aningaasaleerusunnerat eqqarsaatigalugit oqaatigereersimavarput nuna nunanik allanik aningaasaqarnikkut isumalluuteqarpallaaruni nammineq aqussinnaasaat annikillisartut. Matumanili inuuniarnikkut aningaasaqarnitsigullu assorunnerput danskit aningaasaliiniarnerannut akuersilluta. Naalakkersuisut sinaakkutissatut aningaasaliinissamut isumaqatigiissuteqarsimanerat tunuliaqutserneqassappat partiit peqataatinneqarnissaat piumasaraarput, isumaqatigiissutinilu taamaattuni Naalakkersuisut atsioqateqannginnerminni partiinut isumaqatigiissuteqarsimanissaat pisariaqartoq naqissusersimallutigu.
Minnerunngitsumik nunatsinniit aningaasat nunatta avataanut aniasut annikillisarneqarnissaannut tunngasumik misissuisoqarnissaa pisariaqavissoq isumaqatiginninniarnermi ilanngullugu anguniarsimasarput isumaqatigiissummi siunnerfeqartumik ingerlanneqarsinnaalissammat.
Piumasaqaatigisimasagut arlaqartut taamatut pingaarnersiuilluta saqqummiuppagut, naalakkersuisunut partiillu isumaqatiginninniaqatigiinnitsinnut qutsavigaagut.
