Aaja Chemnitz Larsen qineqqusaarnermi affialluarfigineqartumi: naalagaaffiup tapiissutai, imaluunniit oqartussaasuunermut akiliut?
”Atagu kalaallinut atatillugu pissutsit ersarissariartigit”, Aaja Chemnitz Larsen Københavnimi Kalaallit Illuanni ministeriuneq Lars Løkke Rasmussen peqatigalugu qineqqusaarnermi Kalaallit Nunaata siunissaanik naalagaaffeqatigiinnermillu sammisaqartillutik oqarpoq. Ataatsimiinneq Aajap facebookiatigut toqqaannartumik malinnaaffigineqarsinnaasoq tamakkiisumik peqataaffigineqarpoq, tassami inuit 140-t takkussimapput. Aajap ministeriunermut Lars Løkke Rasmussenimut eqqarsaatersuutit annertuut, nutaat pingaaruteqartullu apuuppai.
Sammisassat arlallit tikinneqarput, ilaatigut Issittumut ministereqarnissamut, aningaasat naalagaaffimmit tapiissutit taaguutaasa allanngortinneqarnissaannut, imaalillugit oqartussaasuunermut akiliutit (suverænitetsafgift) kiisalu Issittumi sillimaniarneq ataatsimut isigalugu apeqqutit sammineqarput.
”Naalagaaffiup tapiissutaanik oqalunnermi Kalaallit Nunaata kisimi pissarsisuusarnera, taamatullu Danmarkip kisimiilluni tunisisuuneratut, oqariartuutigineqarpoq. Nunanut allanut tunngatillugu Kalaallit Nunaat naleqartitsivoq, Danmarkilu nunaarannguusutut naalagaaffissuarnut attaveqarsinnaalersitsillugu. Tapiissummi utimut pissarsiaqanngineq isumagineqarpoq, tamannalu paatsoortitsilluinnartuuvoq Kalaallit Nunaatalu Danmarkimut naleqarnera nalornissutigineqartariaqanngilaq. Issittumi sunniuteqarnissamut Danmarkip aqqutigisussaavaatigut, taamatullu nunat akornanni politikkernertigut nunap inissisimaffiatigut annertuutigut danskit naalakkersuisuinut soqutiginaateqarluta”, Aaja qineqqusaareernermi oqaluttuarpoq.
”Namminersortuunermut akiliummi pissarseqatigiinneq oqariartuutigineqassaaq, danskittaaq tungaanniit pissarsiaqarneq akuersorneqarluni. Kalaallit Nunaammi Danmarkimi amtiunngilaq, nunaallunili namminersortoq”, Aaja qineqqusaareernermi oqarpoq.
Aaja nangippoq, ”Oqaatsit isumaasa kinguneqartarnerat upperivara. Naalagaaffiup tapiissutaanik oqartarneq Danmarkip Kalaallit Nunaatalu peqatigiinnerannut atatillugu inuit paasinnittaasiannut apeqqutaaqaaq”, Aaja Chemnitz Larsen oqarpoq.
Inuit Ataqatigiit siulittaasuat, Múte Bourup Egede, qineqqusaarnermi pisumut iluarisimaarinneqaaq: ”Inuit Ataqatigiit Folketingimiititaat aalaakkaasuullunilu tunngavigissaaqaaq, 2001-miillu Christiansborgimiissimanitsinni politikkikkut sulilluarnitsigut suleqatiginnilluarnitsigullu assorsuaq angusaqarsimavugut. Allaat ministeriuneq qineqqusaarnermi ulapikkaluaqisoq qineqqusaarnermi peqatigisinnaallutigu. Qinigaaffimmi tullermi angusassagut annertusassavagut. ”
”Inuit Ataqatigiit Folketingimi malunnaateqarnerpaallutillu aalaakkaasuunerpaajunerat akerlilerneqarsinnaanngilaq. Tamanna angusagut qiviaannarutsigit takoriaannaavarput, allaat qineqqusaarnermi ministeruneq ulapikkaluaqisoq peqatigisinnaallutigu”, Aaja Chemnitz Larsen oqarpoq.
Lars Løkke Rasmussenip saniatigut Aaja Chemnitz Larsenip aamma Inuit Ataqatigiit Mette Frederikseni qaaqqusimagaluarpaat, ulluliinissarli ajornartorsiutaammat tamanna pisinnaasimanngilaq.
