Ukiorpassuarni arnat angutillu akornanni naligiinnerulernissaq Inuit Ataqatigiit sulissutigisarsimavaat. Ullumikkut Inuit Ataqatigiit Naalakkersuisuutitaat, Inatsisartunut Siulittaasuat, arnat angutillu amerlassusaat naligiipput, Inuit Ataqatigiinniit pingaartittuaratsigu naligiimmik nammaqatigiillutalu oqartussaaqataanissarput. Siunissami neriuutigaarput arnat angutillu qinikkat, Inatsisartuniippat, Kommunemi nunaqarfinnilu, arnat angutillu amerlaqatigiinnerulissasut. Innuttaasummi tamat sinnerlugit sulissagatta, innuttaasut assigalugit sinniisuussagatta.
Ukiorpassuarni arnaq qanoq ittuussanersoq; arnaq paarsisuussasoq, arnaq misigissuseqassasoq, arnaq iggavimmiissasoq, arnaq asaassasoq, arnarlu siuttuunani, ningiuunanilu sulisuussasoq; ikiorti, allatsi, kaffi tii kaagiliortoq, erruisoq, meeqqerivimmiissasoq, niviarsiaassasoq, meeqqiussasorlu inuiaqatigiinnit naatsorsuussaasarpoq.
Angut qiassanngilaq, misigissuseqassanngilaq, pilersuissaaq, piniarsinnaassaaq, nukittuunik biilerujussuarnillu kisiat pinnguaqassaaq, siuttuussasoq, oqartussaasuussasoq, aqutsisoq, sanasoq, qunusuitsoq, sanngiiffeqanngitsutullu inuiaqatigiinnit naatsorsuussaasarpoq.
Naatsorsuutit taamak ittut allanngortariaqarput, piviusoq imaammat: tamatta misigissuseqarpugut, aliasuttarpugut, siuttuuinnaavugut, aqutsisinnaavugut, meeqqatsinnut asanninnermik tunniussisinnaavugut, sanasinnaavugut, igallutalu. Qalipaatit suulluunniit atorsinnaavagut nuannaralugillu. Inuk piumassusilik susinnaasorluunniit ilisimagatsigu upperalugulu. Apeqqutaaginnarpoq qanoq kaammattuisinnaatiginersugut inoqatitsinnillu inissaqartitsiginersugut. Perorsaanikkut tamanna anguneqarsinnaavoq. Sunngorusukkuit, ilikkarusukkuit, kinaassuseqarusukkuillu allaanerulaartumik, inissaqarputit. Sapinngilatit.
Oqartussaaqataaneq Inuit Ataqatigiinniit imak takorloortarparput; arnat angutillu akornanni suleqatigiissinnaaneq, naligiimmik ataqqeqatigiittumillu ingerlanneqassasoq. Kiisalu inuiaqatigiit akornanni tamat assigiinngissutsit misigissutsit, sanngiissutsit artorsaatillu nukittuffiillu tamanit aqqusaarneqarsinnaasut ilisimaaralugu suleqatigiissinnaasugut angusinnaagippullu.
Arnat Ulluata eqqaasittuarlitigut, arnat angutillu Arnat Ulluat pisariaqartimmassuk, eqqaasittuassalluta, sooq Arnat Ulluat pilersinneqarsimanersoq, suullu suli allanngortissinnaanerigut suleqatigiissutigisinnaanerigullu.
Minnerunngitsumik Naalakkersuisutta arnartatta ukiorpanni spiralilersortissimanerisa inuit pisinnaatitaaffiinik unioqqutitsisimasoqarsinnaaneranik misissuisoqarnissaanik noqqaanerat qujassutigaarput taperserlugulu. Inuit Ataqatigiinniit Inuit Pisinnaatitaaffiisa ataqqineqarnissaat qulakkeerneqarnissaallu pingaartikkatsigit.
Kinaluunniit kinaassusini nammineerluni sanarfisinnaatitaavaa, kinaluunniit allaanerusoq inissaqarpoq, kikkulluunniillu kukkusutut inuuneqarsinnaanngillat. Meeqqat inuillu pisinnaatitaaffigaat, nammineq kinaassuserput ilusilersussallugu pigissallugulu inissaqartinneqassasugullu akuerisaalluta, ataqqineqarlutalu.
Tamatta inissaqarpugut, tamatta atorfissaqarpugut, tamattalu suleqatigiissutigisariaqarparput.
Pipaluk Lynge, Inatsisartunut ilaasortaq
