Nunatsinni aalisarneq nunatsinnut inuiaqatigiinnullu iluanaarutaalluarnissaa Ilulissani Inuit Ataqatigiit kissaatigaat
IIA, Ilulissani Inuit Ataqatigiit, Nunatsinni aalisarnerup patajaatsumik, qularnaatsumik aningaasarsiorfiulluartumillu ingerlanissaa kissaatigaat; tamannalu qulakkeerneqassappat aalisarnermut inatsimmik nutaamik inatsisiliortoqartariaqartoq nassuerutissaavoq.
Nunatsinni aalisarnerup inuiaqatigiinnut iluanaarutaalluarnissaa qulakkeernissaa pingaartipparput; taamaammat Ilulissani aalisartut naalaarpagut. Aalisartut inatsisissap tusarniutigineqarnerata sivitsorneqarnissaannik kissaateqarnerat tusaavagut; taamaammat tusarniaanerup sivitsorneqarnissaa Naalakkersuisunut kaammattuutigerusupparput.
Taamak kaammattuuteqarnitsinnut tunngaviusoq tassaavoq; aalisarnerup pitsaasumik aningaasarsiorluarfiusumillu ineriartorteqqinnissaanut tusarniaanermi akissuteqarniartut sapinngisamik piffissaqarluarlutik akissuteqarnissaannik periarfissaqarniassammata. Taamaammat aamma Avannaata Kommuniani kommunalbestyrelsip tusarniutip kinguartinneqarnissaannik kissaateqarnera IIA-miit taperserparput.
Taamatut kissaateqarluta kaammattuinitta saniatigut kaammattuutigaarput aalisartut peqatigiiffitsik kattuffitsillu aqqutigalugit tusarniaanermut akissuteqaqqullugit; tassuunami inatsisissatut siunniussami akornutaasinnaasut sanngiiffiusinnaasulluunniit oqaasertalerneqarniassammata – Naalakkersuisullu, minnerunngitsumillu Inatsisartut, sapinngisamik amerlanerpaanit inooqataaffigineqarsinnaasunik aalajangersaanissamut tunngavissaqarniassammata.
Lis Møller, Ilulissani Inuit Ataqatigiit Siulittaasuat
