Inuit Ataqatigiit: peqqinnissaqarfiup aaqqissuuteqqinnissaanut iliuuseqarasuarneq pisariaqarpoq
Ulloq 22 maj 2023 Peqqinnissaq pillugu Ataatsimiititaliarsuup isumaliutissiissutini saqqummiuppaa. Ataatsimiititaliarsuup oqariartuutaanut tassalu; tamatta peqqinnissaqarfiup pillugu akisussaaffeqarnerput isumaqatiginerusinnaanngilarput.
Peqqinnissaqarfipput maanna iliuuseqarasuartoqanngippat taamatullu ingerlaannarutta isasuussaaq, ajornartorsiorpugut, taamaammallu piffissaq qaninnermut aaqqiissutissanik aammattaarlu ungasinnerusumut aaqqiissutissanik naalakkersuinikkut suliaqartariaqarpugut.
Inuit Ataqatigiit kissatigaat partiit imminnut naapillutik pilersaarusioqatigiittariaqartut, taamaaliunngikkutta angusinnaasagut arriippallaamik anguniarsarissavagut.
Inuit Ataqatigiit politikkikkut oqaaseqartartuat Agathe Fontain isumaliutissiissut pillugu ima oqaaseqarpoq: “Peqqinnissaq pillugu Ataatsimiititaliarsuup isumaliutississutaani amerlasuunik innersuussuteqarpoq, taakkulu naalakkersuinikkut isummerfigineqarnissaat avaqqunneqarsinnaanngilaq. Taamaammat partiit ataatsimoorluta naapiffigisinnaasagut ujartariaqarpagut.”
Inuit Ataqatigiit partiit allat peqatigalugit aaqqiissutissarsioqatigiinnissamut piareersimapput.
Politikkikkut oqaaseqartartoq
Inuit Ataqatigiit sinnerlugit
Agathe Fontain
