Ilinniarfinnik pilersitseqattaarnermit pingaanersiuineq sammisariaqarput.
Inuit Ataqatigiit Inatsisartuni Ilulissani takornarialerinermik ilinniarfimmik pilersitsisoqartariaqarneranik misissuisitsinissamik aalajangeeqqusineq tapersinngilarput.
Isumaqarpugut Ilulissani immikkut takornarialerinermik ilinniarfimmik pilersitsisoqarnissaannut piffissaanngitsoq , tamatumunnga pissutaavoq massakkut ilinniarfiup Campus Kujalliup takornarialerinermik ilinniartitsisarnermini suliamik kivitsillualereermat.
Isumaqarpugut ilinniarfinnik pioreersunik nunatsinni piffinni assigiinngiiaanni pilersitseqattaarnissaq isumassarsialatsialaanngitsoq, inuiaqatigiit amerlanngilagut isumaqarpugullu nukiit, aningaasat piginnaasallu pitsaanerusumik iluaqutaanerusumillu atorsinnaagigut atorfissaqartikkigullu. Pioreersunik pilersitseqattaaginnarnermiit pitsaaneruvoq nunatsinni ilinniakkat pisariaqartitagut aallaavingalugit aaqqissuussineq.
Inatsisartunit uagut Naalakkersusumut innersuussutigaarput tarnip pissussaannik ilisimasalinngorniarfimmik pilersitsineq, aamma eqqarsaatigineqarsinnaavoq nunatta pissarititaannik tunisassiornermik ilinniarfimmik pilersitsisinnaaneq? Iliniarfiit nunatsinnut inuiaqatigiit ingerlanneqarnerani iluaqutaalersussat pisariaqartippagut. Sapiissuseqarnerusariaqarpugut ilinniartitaanermi pisariaqartitagut naapertorlugit pingaarnersiuissaq pilersitsiortornissamut, periarfissaareersunik pilersitsiortornermiit pitsaanerusumik kinguneqartussanut aalijangiisarutta nutaaliornissaq ungasilliartussammat.
Pioriinngitsumik pilersitsinerup kingunerissavaa nunatta pisuunnguallanneranik, inuussutut ilinniarfissamik nutaamik periarfissaqalissapput, piginnaasallut nutaat pilersinneqassallutik
Mariane Paviasen
Inuit Ataqatigiit tunuliaqutaralugu inatsisartuni ilaasortaq.
