Allattoq Folketinigimi ilaasortaq Aaja Chemnitz, Inuit Ataqatigiit
Nuummi Ilulissanilu mittarfiit 2024-mi ammarpata Kangerlussuaq ammatiinnarneqartariaqarpoq.
Ukiut tamaasa timmisartut amerikameersut 500-t missaanniittut Kangerlussuarmut orserniarlutik mikkallartarput. Sakkutuut timmisartuisa Kangerlussuaq aamma atugarivaat, taamaattumik danskit naalagaaffiata Kangerlussuup ingerlanneqarneqarneranut akilersueqataasariaqarput, pisariaqartitsigaangatalu uagut kalaallit atortassallutigu, takornarialerinerni ilisimatusarnernilu.
Akunnerpassuit ullullu arlallit Kangerlussuarmiinnikuusugut amerlavugut – piumasarisatsinnik piumasarinngisatsinnilluunniit Kangerlussuaq sorpassuartigut oqaluttuarisaanitsinnut ilaavoq, immikkullu namminiussuseqartumik kultureqartutut oqaatigineqarsinnaalluni.
Kangerlussuaq inuppassuarnut aamma angerlarsimaffiuvoq. Taamaattumik apeqqutit Kangerlussuarmut tunngasut sukkasuumik qulakkeerneqartariaqarput. Qinersereernerup kingorna Inuit Ataqatigiit Illersornissaqarfiup Kangerlussuarmi atuinera pillugu aaqqiissutissamik qulakkeerinnittussamik ujartuissapput, innuttaasut Kangerlussuup siunissaa pillugu paasisaqarniassammata – tamanna pisariaqartippaat.
