2023-mut aningaasanut inatsisissamut siunnersuummi meeqqat ilinniartitaanerullu salliutinneqarnerat Inuit Ataqatigiit Inatsisartunut ilaasortaasa iluarisimaarpaat.
Naalakkersuisut aappaagumut aningaasanut inatsisissatut siunnersuutaat ullumi ataasinngornermi aggustip 22-anni saqqummiunneqartoq Inuit Ataqatigiit Inatsisartunut ilaasortaatitaasa iluarisimaarpaat.
“Pingaartumik aningaasaliissutissat meeqqat atugaannik pitsanngorsaataasussat Inuit Ataqatigiit Inatsisartunut ilaasortasa ilassilluarpaat, soorlu Dronning Ingridip Napparsimmavissuani meeqqat uninngaviannik nukittorsaaniarneq ukiorpaalunni suneqarsimanngitsoq kiisami piviusunngortussanngormat iluarisimaaqaarput”, Inuit Ataqatigiit oqaaseqartitaat Hans Aronsen oqarpoq.
Naalakkersuisut aningaasanut inatsisissamut siunnersuutaanni meeqqanut tunngasut arlaliupput, soorlu oqarasuaatikkut saaffiginnittarfik Tusaannga ulloq unnuarlu ullut tamaasa ammasalissaaq meeqqallu tarnikkut nappaatilit annertunerusumik suliniarfigineqarnissaannut ukiunut arlalinnut aningaasanik immikkoortitsisoqassalluni.
Ilinniartitaanerup tungaatigut suliniutissatut siunnersuutigineqartut Inuit Ataqatigiit oqaloqataaffigissallugit piareersimavoq, tamatumanilu iliuusissat siunissamut qulakkeerinnittut pisariaqartut Inuit Ataqatigiit isumaqarput.
”Nunatsinni aningaasat ilinniartitaanermut atortakkavut amerlapput, taamaattoq ilinniakkamik naammassinnittartut ilinniakkanillu atorfissaqartitatsinnik ilinniartartut suli amigarput. Taama ingerlaannassagutta sulisut avataanit tikisineqartartut taarseriartornerat kissaatigisatsinnit sukkaannerujuassaaq, namminiilivinnissamillu anguniagaqarnermi arriillisaataalluni”, Inuit Ataqatigiit oqaaseqartitaat Hans Aronsen oqarpoq.
Nunatta aningaasarsiornera patajaakkaluartoq ukiuni aggersuni unammilligassat upalungaarsimaffigineqarnissaannik Naalakkersuisut oqariartuutaat Inuit Ataqatigiit Inatsisartunut ilaasortaatitaasa tapersersorluinnarpaat.
“kaammattuutigaaput suliniutit aningaasanik isaatitsiffiusinnaasut nutaat ujartorneqarnerat pimoorunneqarnerussasoq”- anigaasaqarnermut oqaaseqartartoq Hans Aronsen taama naggasiivoq.
Attavissaq: Hans Aronsen
Oq. 22 87 33, haaro@inatsisartut.gl
