Inuit Ataqatigiit iliuuseqarsinnaalluartumik allattoqarfimminni pisortassarsiorput, pisortassap partii siunissamut ikaarsaartinneranut aqutseqataassaq. Allattoqarfimmi pisortaq pissusissamisoortumik partiip politikikkut aqutsisuisa ataanni tulliulluni inissisimaffeqarpoq, taamaalillunilu Inuit Ataqatigiinni qitiusumik inissisimalluni Kalaallit Nunaata siunissami ineriartortinneqarnerani suleqataallunilu ilapittueqataasinnaalluni. Atorfik partiip Nuummi allaffiani inissisimavoq, ulluinnarnilu aqutsisut qaninnertut qullersaapput.
Inuit Ataqatigiit 1976-mi politikikkut peqatigiiffittut pilersinneqarput, ullumikkullu Kalaallit Nunaanni politikikkut aaqqissuussaanermi annerpaatut siuttutullu nunap politikikkut aqunneqarnerani siammasissumik toqqammaveqartumik inissisimallutik. Inuit Ataqatigiit inuiaqatigiinnik nukittuunik, tamat oqartussaaqataanerinik, naligiinnermik inuillu pisinnaatitaaffiinik ineriartortitsinermi ataatsimoorput. Inuit Ataqatigiit naalakkersuisooqatigiinnermi, Inatsisartunilu partiitut siuttuupput, Naalakkersuisunilu arfinilinnik, Inatsisartunilu aqqaneq marlunnik ilaasortaatitaqarlutik. Taakku saniatigut borgmesteriiffinnit tallimanit pingasut borgmesteriutitaraat. Partiip allatseqarfia Nuummi inissisimavoq, tallimanillu sulisoqartussatut aalajangigaalluni.
Allattoqarfimmi pisortaq allattoqarfiup siulersorneqarnerani akisussaasuussaaq, makku ilanngullugit:
- Inatsisartuni siunnersortinik/immikkut siunnersortinik aqutsineq
- Partiimi attaveqarnikkut siunnersuineq
- Ulluinnarni ingerlatsinermi partii sinnerlugu akisussaasuuneq
- Kommunalbestyrelsinut, nunaqarfinnullu aqutisunut ilaasortanut immikkoortortaqarfinnullu partii sinnerlugu siunnersuineq
Akisussaaffinnut makku aamma ilaapput:
- Partiip maleruagassaasa suleriaasiisalu malinneqarnerannut akisussaaneq
- Nuna tamakkerlugu ataatsimiinnernut, ataatsimeersuarnernut, aasaanerani ataatsimiinnernut, kiisalu partiip politikikkut aqutsisui isumaqatigiissuteqarfigalugit politikikkut ataatsimiinnernik annerusunik allanik aggersaasarnernut akisussaasuuneq kiisalu allatseqarfimmi sulisut sinneri suleqatigalugit taakku pillugit attaveqarnernik aqutsineq
- Ukiumut marloriarluni ingerlatsinermik nalunaarusiortarnermik akisussaaneq, tassani partiip malittarisassai naapertorlugit naatsorsuutaagallartunik oqaaseqarfigisat ilanngullugit
- Allattoqarfiup ulluinnarni aqunneqarneranut allattoqarfiullu sulisuinut akisussaasuuneq, tassani suliassanik agguataarinninneq taakkulu isumagineqarnerannik qulakkeerinninneq
- Allattoqarfiup qinikkanik sullissinerata pitsaasumik ingerlanneqarneranik qulakkeerinnittuuneq
- Allattoqarfiup aaqqissuussaanerata Kalaallit Nunatsinni politikikkut pissutsinut naapertuunneranik akisussaasuuneq
- Immikkoortortaqarfinnit immikkoortortaqarfinnullu paasissutissiinerup annertullunilu pitsaasuuneranik akisussaasuuneq, kiisalu partiip sulinerani immikkoortortaqarfiit annertuumik akuutinneqarnerannik isumaginnittuuneq
- Partiip ulluinnarni aqutsisuisa ataatsimiinnissaannut aggersaanermut, ingerlatsinermut malitseqartitsinermullu akisussaasuuneq, tassani aalajangernermik imaqarnilianik akisussaaneq ilanngullugu
- Partiip politikikkut sulinerata ingerlaavartuuneranut akisussaasuuneq
- Allatseqarfiup partiillu missingersuutaanik malinneqarneranik akisussaasuuneq. Tamanna partiip ulluinnarni ingerlanneqarneranut akisussaasoq suleqatigalugu ingerlanneqassaaq
- Partiip ilaasortaanik pitsaasumik sukkasuumillu allattoqarfimmit sullinneqarnerannik qulakkeerinninnermut akisussaasuuneq
- Partiip attaveqarneranut akisussaasuuneq, tassani nittartakkakkut quppernerup nutarterneqartarneranut partiillu malittarisassai naapertorlugit nutaarsiassanik saqqummersitsisarnermut akisussaaneq
- Partiip siulittaasuanik, partiip siulersuisuuneranik partiillu ulluinnarni aqutsisuinik pingaarnertut siunnersuinermut akisussaasuuneq
- Ulluinnarni aqutsisut suliaasa piviusunngortinneqarnerannut akisussaasuuneq
- Allattoqarfiup Kalaallit Nunatsinni politikikkut ineriartorneranik malinnaatitsineq, Inuit Ataqatigiillu politikikkut anguniagaasa piviusunngortinneqarnerannik suliniutinik siunnersuusiornermut akisussaasuuneq
Qinnuteqartoq piukkunnartoq Inuiaqatigiini pissutsinik, inatsisilerinermik, aningaasarsiornermik, politologimik assigisaanilluunniit akunnattumik sivisussusilimmik sivisuumilluunniit ingerlaqqiffiusumik ilinniagaqartuuvoq. Tamatuma saniatigut aqutsisutut ilinniagaqarneq pikkorissarsimanerluunniit iluaqutaassaaq. Pineqartulli aqutsisutut suliaminik, atorfimmullu piumasaqaatigineqartunik naammassinnissinnaanera pingaarneruvoq. Taakku makkuupput:
- Kalaallit oqaasiinik allattariarsornikkut oqalunnikkullu piginnaaneqarluartuuneq kiisalu qallunaatut tuluttullu piginnaasaqarneq iluaqutaassaaq
- Politikkimi ilisimaarinninneq, nunatsinnilu politikikkut pissutsinut ilisimasarneq
- Nutaarsiassanik Namminersorlutillu Oqartussanik malinnaaqqissaarneq, tamatumalu saniatigut sulinermi atugassanik pigisimasanik naapertuuttunik pissarsiniartuarneq
- Nammineersinnaassuseqarneq pilersaarutinillu sulisunillu ataqatigiissaarisinnaassuseqarneq
- Ajornanngippat suliffeqarfimmi politikikkut aqunneqartumi, allattoqarfimmiluunniit politikkikkulluunniit sulinermi misilittagaqarneq
- Ajornanngippat aqutsinermik misilittagaqarneq – tassani suliniutinik aqutsineq ilanngullugu
- Qineqqusaarnissanik brandinginillu suliaqarnernik misilittagaqarneq iluaqutaassaaq – tassani attaveqariaatsimik, sunniiniariaatsinik brandinginillu muteerniusunik ilisaqarneq ilanngullugu
- Aalajangersinnaassuseqarneq suliffeqarfiullu atatasimut suliassaanik malinnaasinnaaneq
- Pilersaarusiorsinnaassuseqarneq, tunniusimasinnaaneq iliuuseqarsinnaassuseqarnerlu
- Suleqateqallaqqissuuneq suleqatiginnissuseqarnerlu kiisalu saqitsaannernik passusisinnaassuseqarneq
- Ilusilersuillaqqissuuneq aaqqissuussillaqqissuunerlu
- Ilisimasalinnik isumasiuillaqqissuuneq attaveqaatinillu pilersitsisinaalluartuullunilu attaveqallaqqissuuneq
- Ineriartornermut allannguinermullu ammasuuneq
- Allanik sulerusulersitsillaqqissuuneq angusaqarsinnaassuserlu
- Inunnik ilisimanittuuneq
- Nittarsaaffinni assigiinngitsorpassuarni qaffasissutsini assigiinngitsuni tutsuiginartumik attaveqarsinnaaneq
Inuit Ataqatigiit ilinniakkatigut aaqqissuussaanikkullu suliffimmik pissanganartumik unammilligassaqarluartumik ineriartornissamillu periarfissaqarluartumik, kiisalu suliffeqarfiup aaqqissuunnerata ingerlaqqinnerani sunniuteqarluarluni peqataanissamut neqerooruteqarput. Allattoqarfimmi pisortaq siammasissumik akisussaaffeqassaaq, suliatigullu aqutsinikkullu assigiinngiiaartorpassuarnik unammilligassaqassalluni.
Inuit Ataqatigiit Kattuffianni allattoqarfimmi pisortaagallartup Ilannguaq K. Mølleri oqarasuaatip normua +299 34 62 70 atorlugu atorfik pillugu itinerusumik paasisaqarnissaq pillugu attaveqarnissamut tikilluaqqusaavutit.
Tamatuma saniatigut Inuit Ataqatigiit Kattuffiata Pointer A/S qinnuteqartussanik naapertuuttunik nassaarnissamut suleqatiseraa. Taamaammat Pointer A/S-mi pisortaq partnerilu Inger Ingvardsen oqarasuaatip normua +45 29 36 86 36 atorlugu paasissutissanik erseqqinnerusunik piniarfiginissaanut tikilluaqqusaavutit. Inuit Ataqatigiit Kattuffiannut Pointer A/S-imullu saaffiginninnerit tamarmik allanut ingerlateqqinneqarnavianngillat.
Qinnuteqaat piaarnerpaamik ajornanngippallu kingusinnerpaamik ulloq 29. Maj 2022 ilklm@inatsisartut.gl imaluunniit imi@pointersearch.dk nassiunneqassaaq.
