Pinngitsoorusunngilangulli ullumikkut nunatsinni piniarnikkut pissutsinut nutaaliaasumut, ilaatigullu ilungersunarsinnaasartunut ineriartorfigiumasatsinnullu nuliatut aappatullu piniartunut anersaakkullu tapertaalluartuusunut aamma maana pilluaqqusissalluta.
Ulloq 15. novemberernerani nunaqarfinnguarmi piniarnerinnarmik inuuniuteqarnerup nalaani pingaartorsiornartoq, ullaaq manna siniffinniik makinnissara sioqqullugu sikornerlugu takorluulaarpara.
Takorloorpara taamanikkut nunaqarfinnguanni ullut makku nalaanni ukiarissaarsimatillugulu puisit neqaanniik qerisunik suliarilluakkanik, mattannik neqinillu quanik (qerisunik), qeeqqanik uukkanik saarullinnilluunniit paqqaartulianik, miternik appanillu ukialeqqaami ataatannik pisaasimasunik sivisulaartumillu nivingasimasunut paarnanillu qeritissimasanik, tamaavimmik assigiinngitsumik suliaasimaneri pissutaarpiarlutik mamassusaasaa takorloornerisa illingiuummertippaannga, aammalu piniartut qanoq atungaqarlutik piniarsimaneraat piniutaasa atortuisalu takorloornerisa, tassanngaannaq nikuipiloortippaannga allaat ingalaakkut silammut itsuartariaqalersillunga. Takorluukkakkami piviusuupput.
Aamma takorloorpakka anaananga nunaqqatigullu piniartup nuliai allat, taamanikkut ammip pingaarnerpaamik inuuniutaasup pitsaanerpaamik suliarineqarnissaanik pingaartitisut, taamanilu ammip pitsaassusaat A-B-C-nik nalilersorneqartuartarput. Taamanikkullu aatsaat illumi sermimik apummilluunniit aatsitseqqaarluni suliassaasut suliarisarsimavaat.
Ullumikkorpiarli atortut ilaatigut nutaalianngortitersimasut soorunami sutigut tamatigut oqinnerusumik atungassaqartilersimavaatigut. Tamanna assut qujamasuutingaarput neriutingiuarparpullu piniartut aalisartullu inuussutissarsiornerminni timikkut aamma peqqinnerulernerannik kinguneqarluartut.
1990-kkunnilu nunarsuup sinneranut piniarnikkut sutigut tamatigut ammanerulersinneqarpugut. Tamanna aamma piniarnitsinnut aalisarnitsinnullu ullumikkorpiaq sunniuteqarsimaqaaq, isumaqarpungali tamanna pillugu kalaallit nunaanni nunaqartugut tamatta ilungersorluta pingaartumik kulturitsinni piniarnerup pingaaruteqartuarnissaanik nukittorsaaqatigiittuassasugut.
Taamatut oqaaseqarlunga Inuit Ataqatigiit sinnerlugit sineriassuatsinni Piniartut aalisartullu tamassi pilluaqqoqqippassi.
Hans Aronsen
Inatsisartuni ilaasortaq
Inuit Ataqatigiit
