Naalakkersuisut Siulittaasuata nipisat suaanik pisasseqqinnerminut tunngatillugu ajornartorsiuteqarnera suli piuvoq. Paasissutissat unioqqutitsilluni tunniukkusunngisani kiisami tunniussimalerpai. Tamannalu tunngavingalugu Inatsisartut Kukkunersiuinermut Ataatsimiititalia pisussaaffini naammassillugu sulinissaa Inuit Ataqatigiit naatsorsuutigaat.
Inuit Ataqatigiinniit pitsaasutut isiginngilarput maanna naalakkersuisooqatigiit innuttaasunut malitassiat malinneqartussaasut, imminneq qinikkatut ima pingaakujutsigisumik isigilersimammata allaat inatsisit unioqqutinneqaraluarpata suliassatut pinartutut isiginagu misissuerusaaginnarlutillu aalajangernaveersaaginnarsinnaalerlutik. Inuiaqatigiit inatsisiliortuisa innuttaasunut qoqassiinerat annerpaaq tassaavoq suliassaq pinarluinnartoq kinguarsarlugu isumaarutsikkiartuaarmassuk. Tamannalu peqqunagu suliassaq paasissutissanik pissarsiffiusimasoq ilassutaasumik nalunaarummik Kukkunersiuinermut Ataatsimiititaliaq sulingasuartariaqarpoq.
Inatsisaatsuliorneq naalakkersuinikkut pissaanermik tigummiartut, tassa Siumut, Demokraatit aamma Nunatta Qitornai pissaanertik atornerlussangikkunikku suliassaq sukkanerpaamik suliarissavaat, aamma qinikkat malitassat malinnagit sulisimanerat apeqqusiiffigineqartoq sukkanerpaamik qulaajarneqartussaapput. Inuiaqatigiit qinikkallu naalakkersuinermut tatiginniinnarnissaat angujumallugu qulakkeerinnittussaapput.
Ulloq nutaaq aallartikkaangat naalakkersuinikkkut toqqorterineq ullormik ataatsimik ajornerulertartoq naluneqanngilaq. Piffissaq ingerlaterusaarlunikku, kinguarsaarusaarlutik, isummernaveersaarlutik inuiaqatigiinnut qoqasseerusaarput kissaateqarunarlutik suliassaq ”uunnarpallaarunnaarpat” Naalakkersuisut Siulittaasuat annassinnaassasoq. Maanna naalakkersuisooqatigiit inatsisaatsuliornermut isertuussinermut piginneqataalerput.
Inatsisartut Siulittaasoqarfia paasissutisseerpoq Inatsisartut Ataatsimiititaliai paasissutissanik tunniunnaveersaarneqartunik tunineqartussaatitaasut. Naalakkersuisooqatigiimmi nassuiinnartariaqarput paasissutissanik tunniukkumaneqanngitsut pillugit nunarput inuilu taamak sullinneqartussaanngimmata, tamatumalu kinguneranik akisussaatitsinermikkut kinguneqartitsissallutik.
Naalakkersuisooqatuigiit tatiginanngilluinnartumik nunatsinni naalakkersuinikkut pissusitoqqanut uterfigiumanngeqisatsinnut nunarput ingerlakkaat Inuit Ataqatigiinniit akuerinngilarput. Innuttaasut qisuariarnerat tusaaneqartariaqarpoq. Aalisartut allat aamma inuussutissarsiutigalugu angalateqarnermut malitassanik malinnittussaatitaasut assigalugit qinikkat atugassaqartitaasariaqarput. Qinersisartut assigalugit inuttut allatulli inatsisit malinneqartariaqarput Naalakkersuisuni Siulittaasuugaluaraanniluunniit.
Kukkunersiuinermut Ataatsimiititaliaq sulisariaqarpoq. Sukkasuumik suliassaq naammassineqartariaqarpoq. Toqqorterisoqarpoq akuerineqarsinnaanngitsumik. Naalakkersuisooqatigiit imminnut sullinnertik unitsittariaqalerpaat. Aamma kinguarsaajunnaartariaqalerput akisussaassusertik inuiaqatigiinnut takutittariaqalerpaat.
Inuit Ataqatigiit
Politikkikkut oqaaseqartartuat
Aqqaluaq B. Egede
