Naalakkersuisut Siulittaasuanut apeqqutit
Nipisanniarluni aalisarnermut atatillugu inuttut imminut iluaqutissarsinissaq siunertaralugu Naalakkersuisut Siulittaasuata akuusimasinnaanera pillugu apeqqutinik pilersitsisunik tusarfinnik tutsuiginartunik Inuit Ataqatigiit ilisimatinneqartarsimapput.
Ilisimalikkat tamakku uppernarsaatissaqartinnagit asuli avammut ingerlatinnissaat kissaatigisimanngilarput.
Naalakkersuisulli Siulittaasuata Inatsisartuni ilaasortat arlallit tusaasaannik partiit gangianni tallimanngorneq 29. Maj 2020 oqaatigaa nipisanniarnermut atatillugu isertitat nammineq tigusarsimanagit nuliamili kontoanut ikineqartartut, tassa nipisannik pisassiissutinik aalisartut aalisarnerminni ilaatigut atorsimammassuk atormassullu Naalakkersuisut Siulittaasuata angallataa.
12. maj 2020 nipisannik pisassiissutit Nuup Maniitsullu eqqaanni aqutsiveqarfinni aalisarneqarsinnaasut 204 tonsinik amerlineqarput. Tamannalu sumiiffinni allani aalisartunut pitsaanngitsumik kinguneqarpoq. 25. Maj 2020 Naalakkersuisut tusagassiuutinut nalunaarput qaffaasoqarnissaanut aalajangertut tassaasut Naalakkersuisut tamarmiusut.
Inuttut imminut iluaqutissarsinissaq siunertaralugu Naalakkersuisut Siulittaasuannik pasilliinissaq alloriarneruvoq imaannaanngitsorujussuaq. Inuttaatali nammineq partiit gangianni 29. Maj 2020 oqaaserisa tusareerlutigit allatut ajornartumik apeqqutinik arlalinnik Naalakkersuisut Siulittaasuat aperisariaqarparput, taakkualu §37 naapertorlugu apeqqutitut maannakkut suliarineqarput.
Inissisimanini atorlugu inuttut imminut iluaqutissarsinissaq siunertaralugu iliuuseqarsimanerluni iliuuseqarsimannginnerluniluunniit Naalakkersuisut Siulittaasuata innuttaasut maannakkut oqaluttuarisinnaava, imaluunniit §37 naapertorlugu apeqqutit akinissaanni taamaaliorsinnaalluni.
Kaammattorumavarpulli piaartumik taamaaliornissaa, tassami Naalakkersuisut Siulittaasuatut akisussaaffimmik tigummiaqarpoq, pisariaqanngitsumik pasillerneqaatigisassarinngisaminik.
Inuulluaqqusilluta
Inuit Ataqatigiit Inatsisartuni
