Narsarsuaq
Narsarsuaq inuunnut amerlasuunut minnerusumik annersusumilluunniit eqqaamasaqarfiusimassasoq qularutiginngilara.
Sorsunnersuup aappaani Narsarsuup mittarfia Amerikarmiunit pilersinneqarsimavoq. Tamanna ilaatigut silaata patajaatsuunera tunngaviulluni. Nunataalu sumiiffia, pilersitsinissamut periarfissalerujussuunera.
Narsarsuaq nuna naggorissoq, qorsooqissoq aasami naasut sikkertitertut, qaqqai alutornavissunik ujarattallit, puilasut, imaatalu qalipaataa alutornavissoq. Orpippassui, kuanniit naasuilu immikkuullarissumik tipigissut.
Ukiarsariartortarnera, ukiaanera upernariartorneralu tamarmik immikkuullarissunik qalipaatillit.
Eqqaamiui savaateqarfiit ukiorpassuarni Narsarsuaq mittarfittut pingaarutilittut atorsimavaat. Niivertarfilik, napparsimaveeralik, neriniartarfilik, atuarfik meeqqerivillu. Savaatillit arlallit inuusuttuunerminni nuuffigalugu, ukiut 50’it sinnerlugit najugaqarfigisimavaat, angerlarsimaffittut, ilaqutariinnik pilersitsiffittut aammalu inuunerminnik ineriartortitsiffittut.
Allagaq una misigissutsinut qanittumik oqaasertalersugaasinnaavoq. Nammineq Narsarsuaq meeraallunga najugaqarfiginikuuara. Meeqqerivimmiitarsimavunga, atualerfigalugulu. Massakkumullu attuumassuteqarfigiuarsimallugu.
Narsarsuarmi inuuneq, pingaartumik meeraanermi,kiffaangissuseqarfiusimavoq toqqissisimanarfiullunilu. Taamaatumik inuppassuit nuannersumik eqqaamasaqarsimassasut ilimagilluinnarpara.
Narsarsuarmi innuttaasut ukiuni amerlasuuni malinnaavigisimavakka, nalorninartumik inissisimanerat.
Inissisimaffik peqqinnanngitsoq. Taamaattumik pingaaruteqarpoq innuttaasut takuneqarnissaat, tusaaniarneqarnissaallu, puujorneqarnatik.
Narsarsuaq suli ineriartortinneqarsinnaavoq, periarfissarpassuarnik peqarpoq. Tamanna aamma Inuit Ataqatigiit eqqumaffigaat.
Inuit ataqatigiit sinnerlugit ukiorpassuarni Narsarsuarmi sulisimasunut aammalu innuttaasunut peqataasimasunut qujarusuppunga.
Narsarsuaq ukiuni amerlasuuni mittarfittut ingerlalluartuuvoq, innuttaasut suleqatigiilluarlutik. Nunaqarfik inunnut amerlasuunut pingaarutilik.
Ullumi Narsarsuarmiunut ulloq misigissutsinik artornartunik imaqartoq. Nukittunissassinnik kissaappassi, aammalu erseqqissarusuppara eqqaamaneqartusi.
Inuit Ataqatigiit sinnerlugit
Paarma Lund Kreutzmann
