Meeqqat atuarfiani allannguineq susassaqartunik akuutitsiffiullunilu isumaliutigilluagaassaaq
Maluginiarparput innuttaasut Naalakkersuisut inatsisimmut allannguutissatut siunnersuuteqarlutik tusarniaanerannut soqutiginnillutik isummersornerat. Tamanna paasilluarparput, meeqqammi atuarfiat ilaqutariippassuit inuunerannut attuumassuteqarpoq.
Siullertut Inuit Ataqatigiit oqaatsitta, inuiattut oqaatsitta, meeqqat atuarfianni nukittorsarneqarnissaat isumaqatigaarput, tamannali isumaqassanngilaq allanertat oqaasiinik ilinniarneq ajornerulissasoq.
Aappaattut atuartut minnerit atuarneranni fagit ataatsikkut ingerlanneqartartut ikinnerulersinnissaat periarfissaasutut isigaarput, taamaaliortoqassappalli atuareernerup kingorna, angajoqqaat sulineranni, meeqqat ineriartuutaasunik sammisassaqartinneqarsinnaasariaqarput. Tamanna nunatsinnut tamanut atuutissaaq illoqarfinniinnaanngitsoq.
Allannguiniarnermi suleqatigiittussat arlalippassuupput taakkulu annerusumik allannguutissanut suliaqarnissamut akuusariaqarput, ass. kommunit meeqqat atuarnerup kingorna ornittagaqarnissaannut piareersimasussaapput, ilinniusiorneq naleqqussarneqartussaavoq, anguniakkap isumaqatigiissutaasup angunissaanut kattuffiit akuutinneqassallutik, minnerunngitsumillu meeqqat, angajoqqaat skolebestyrelse-t, atorfilittallu aamma isummersortinneqarlutik.
Ukiualunngit matuma siorna Inatsisartut akuerisaannik Nunatsinni ilinniartitaanermut siunnersuisoqatigiit pilersinneqarput. Siunertaavoq paasisat tunngavingalugit ilinniartitaanerup iluani aaqqissuussinerni siunnersoqatigiit siunnersuisarnissaat. Allannguiniarnerni annertuuni Nunatsinni ilinniartitaanermut siunnersuisoqatigiit peqatigalugit suliaqarnissaq pisariaqartut nalilerparput.
Maluginiarparputtaaq kattuffinnit arlalinnik tusarniaassutigineqartoq isornartoqartinneqartoq, taamaammallu isumaqarpugut inatsimmi allannguutaasussamik suliaqarnermi inuiaqatigiit susassaqartullu peqataatinneqarluarnissaat inatsimmullu allannguutaasussamut ilusilersueqataanissaat pingaaruteqartoq.
Tamanna tunngavingalugu Naalakkersuisut kaammattorpagut inatsimmi allannguutissat upernaaq manna Inatsisartunut saqqummiunnagit, piffissaq sivisunerusoq atorlugu isummat kateritsinnissaannik aaqqiissutissanillu ataqatigiissunik suliaqareerlutik inatsimmi allannguutissanik siunnersuusioqqullugit.
Inuit Ataqatigiit siunissami ilinniartitaanerup attaneqarsinnaasumik aaqqissuunneqarnissaannut peqataassaagut. Taamatut nalunaaruteqarnerput ima paasineqassaaq; meeqqatta atuarnerminni ilikkagaqarnissaat pingaarluinnartutut isigigipput taamatuttaarlu meeqqat atuarfiata ulluinnarni inuiaqatigiiinnut ilaqutariinnullu annertuumik sunniuteqarnerata isiginiarneqarnissaa aamma pingaartikkipput.
Inuit Ataqatigiit sinnerlugit
Nivi Heilmann Efraimsen
